ഡല്ഹി; എക്സൈസ് നയവുമായി ബന്ധപ്പെട്ട കള്ളപ്പണം വെളുപ്പിക്കല് കേസില് ഡല്ഹി മുന് ഉപമുഖ്യമന്ത്രി മനീഷ് സിസോദിയയെ ന്യൂഡല്ഹിയിലെ റൂസ് അവന്യൂ കോടതി ഏപ്രില് 5 വരെ ജുഡീഷ്യല് കസ്റ്റഡിയില് വിട്ടു. സിബിഐ അന്വേഷിക്കുന്ന അഴിമതിക്കേസില് സിസോദിയ ജുഡീഷ്യല് കസ്റ്റഡിയിലാണ്. സിസോദിയയുടെ ജാമ്യപേക്ഷ വെള്ളിയാഴ്ച ഡല്ഹി റോസ് അവന്യു കോടതി പരിഗണിക്കും. കസ്റ്റഡികാലാവതി അവസാനിച്ചതോടെയാണ് ഇഡി സിസോദിയയെ കോടതിയില് ഹാജരാക്കിയത്.
സിസോദിയയുടെ ജാമ്യാപേക്ഷയില് പ്രത്യേക കോടതി വാദം കേള്ക്കുന്നത് മാര്ച്ച് 25ലേക്ക് മാറ്റി. റദ്ദാക്കിയ ഡല്ഹി എക്സൈസ് നയം 2021-22 രൂപീകരിക്കുന്നതിലും നടപ്പാക്കിയതിലും അഴിമതി നടത്തിയെന്നാരോപിച്ച് ഫെബ്രുവരി 26 നാണ് സിസോദിയയെ സിബിഐ അറസ്റ്റ് ചെയ്തത്. സിബിഐ അന്വേഷിക്കുന്ന കേസുമായി ബന്ധപ്പെട്ട് സിസോദിയയെ മാര്ച്ച് ഒമ്പതിന് തിഹാര് ജയിലില് ഇഡി അറസ്റ്റ് ചെയ്തു. എക്സൈസ് മന്ത്രിയായ സിസോദിയ ഉള്പ്പെടെ 15 പേര്ക്കെതിരേയാണ് എഫ്ഐആര് തയ്യാറാക്കിയത്. പിന്നീട് ഇഡിയും കേസെടുത്ത് അന്വേഷണം ആരംഭിച്ചു.
