തിരുവനന്തപുരം : സംസ്ഥാനത്ത് കൂടുതല് മദ്യശാലകള്ക്ക് അനുമതി. 243 പുതിയ പ്രീമിയം വാക്ക്-ഇന് മദ്യവില്പ്പനശാലകള് തുറക്കാനാണ് പിണറായി സര്ക്കാര് അനുമതി നല്കിയത്. ബെവ്കോ ശുപാര്ശ സര്ക്കാര് അംഗീകരിച്ചു. ഔട്ട്ലെറ്റുകളില് നിലവിലെ 267ല് നിന്ന് രണ്ട് മടങ്ങ് വര്ദ്ധനയാണ് ഉണ്ടാകുക.
175 പുതിയ ഔട്ട്ലെറ്റുകളും മുന് യു.ഡി.എഫ് സര്ക്കാര് പൂട്ടിയ 68 എണ്ണം പുനഃരാരംഭിക്കാനുമാണ് അനുമതി നല്കിയത്. ഏറ്റവും കൂടുതല് പുതിയ ഔട്ട്ലെറ്റുകള് തൃശൂരിലാണ്. 28 പുതിയ ഔട്ട്ലെറ്റുകളാണ് തൃശൂരില് ആരംഭിക്കുക. തിരുവനന്തപുരത്ത് 27 ഔട്ട്ലെറ്റും തുറക്കും. ഏറ്റവും കുറവ് കാസര്ഗോഡും പത്തനംതിട്ടയിലുമാണ്. ഏഴ് ഔട്ട്ലെറ്റുകള് വീതമാണ് ഇവിടങ്ങളില് തുറക്കുക.
അതേസമയം സംസ്ഥാനത്ത് കൂടുതല് മദ്യം ഉല്പാദിപ്പിക്കാനൊരുങ്ങി സര്ക്കാര്. സര്ക്കാര് ഉടമസ്ഥതയിലുള്ള മലബാര് ബ്രാന്ഡിയാണ് മദ്യപാനികള്ക്കായി മദ്യം സര്ക്കാര് ഒരുക്കുന്നത്. ജവാന് റമ്മിന്റെ ഉല്പാദനം ഇരട്ടിയാക്കാനും തീരുമാനിച്ചു. ബെവ്കോയിലെ മദ്യകമ്പനികളുടെ കുത്തക തകര്ക്കാനാണ് ബ്രാന്ഡി ഉല്പാദനം ആരംഭിക്കുന്നതിനും റമ്മിന്റെ ഉല്പാദനം കൂട്ടുന്നതിനും തീരുമാനിച്ചത്.
