പത്തനംതിട്ട : പത്തനംതിട്ട നഗരസഭാ പ്രദേശത്ത് അനധികൃത വയല് നികത്തല് വ്യാപകമാകുന്നു. കണ്ണടച്ച് റവന്യു വകുപ്പും പത്തനംതിട്ട നഗരസഭയും. റിംഗ് റോഡിന്റെ മിക്ക ഭാഗങ്ങളിലും വയല് നികത്തുന്നുണ്ട്. ജില്ലാ പോലീസ് മേധാവിയുടെ മൂക്കിനുകീഴെ വരെ പട്ടാപ്പകല് വയല് നികത്തുകയാണ്. അനധികൃതമായി നികത്തിയ സ്ഥലങ്ങളിലൊക്കെ കെട്ടിടങ്ങള് ഉയര്ന്നു കഴിഞ്ഞു.
നിയമവിരുദ്ധമായി പണിത കെട്ടിടങ്ങള് ക്രമപ്പെടുത്തി നല്കുന്നതിനും പ്രത്യേക ലോബിതന്നെയുണ്ട്. നഗരത്തിലെ പലതോടുകളും കയ്യേറിക്കഴിഞ്ഞു. കുപ്പിക്കഴുത്ത് പോലെയാണ് തോടുകള്. ഒരു മഴപെയ്താല് തോടുകള് നിറഞ്ഞ് കവിയുകയാണ്. പട്ടാപ്പകല് നടക്കുന്ന നിയമ ലംഘനങ്ങള്പോലും ഇതുവരെ ആരും കണ്ടിട്ടില്ല. നടപടിയെടുക്കേണ്ട ഉദ്യോഗസ്ഥര് നിശബ്ദരാണ്.
