തിരുവനന്തപുരം : തദ്ദേശ തെരഞ്ഞെടുപ്പില് വിജയ പ്രതീക്ഷയില് യുഡിഎഫ് ക്യാമ്പ്. 2015ലെ തെരഞ്ഞെടുപ്പിനേക്കാള് വലിയ ഭൂരിപക്ഷം യുഡിഎഫിന് ലഭിക്കുമെന്ന് യുഡിഎഫ് കണ്വീനര് എം എം ഹസന് പറഞ്ഞു. അഴിമതിയില് മുങ്ങിയ സര്ക്കാരിനെതിരായ വിധിയെഴുത്താകും തെരഞ്ഞെടുപ്പ് ഫലം. പോളിംഗ് ശതമാനത്തിലെ വര്ധനവ് യുഡിഎഫ് തരംഗത്തിന്റെ ഭാഗമെന്നും എം എം ഹസന്. വെല്ഫെയര് പാര്ട്ടി ഉള്പ്പെടെയുള്ളവരുമായുള്ള നീക്കുപോക്ക് ഗുണം ചെയ്യും. ജോസ് കെ മാണി മുന്നണി വിട്ടത് ഒരുതരത്തിലും തിരിച്ചടിയാകില്ലെന്നും ഹസന്.
ആരോപണങ്ങളുടെയും വിവാദങ്ങളുടെയും നടുവില് നില്ക്കുന്ന സംസ്ഥാന സര്ക്കാരിനെതിരായ വിധിയെഴുത്താകും തദ്ദേശ തെരഞ്ഞെടുപ്പ് ഫലമെന്ന പ്രതീക്ഷയിലാണ് യുഡിഎഫ്. കേന്ദ്ര-സംസ്ഥാന സര്ക്കാരുകള്ക്കെതിരായ വികാരമാണ് ഉയര്ന്ന പോളിംഗ് ശതമാനത്തിന് കാരണമെന്നാണ് മുന്നണിയുടെ വിലയിരുത്തല്. അതേസമയം കേരള കോണ്ഗ്രസ് ജോസ് കെ മാണി വിഭാഗം യുഡിഎഫ് വിട്ടത് മധ്യകേരളത്തില് തിരിച്ചടിയാകുമോയെന്ന ആശങ്കയും മുന്നണിയില് ഒരുവിഭാഗത്തിനുണ്ട്.
സ്വര്ണക്കടത്തില് മുഖ്യമന്ത്രി പിണറായി വിജയന്റെ അടുപ്പക്കാരിലേക്കുള്ള കേന്ദ്ര ഏജന്സികളുടെ അന്വേഷണം മകന്റെ അറസ്റ്റും കോടിയേരി ബാലകൃഷ്ണന്റെ അവധിയും അങ്ങനെ ഒന്നിന് പിറകേ ഒന്നായി പുറത്തുവന്ന ആരോപണങ്ങള് മുന്നണിയുടെ ജയസാധ്യത വര്ധിപ്പിക്കുന്നു. സമാനതകളില്ലാത്ത പ്രതിസന്ധിയില്പ്പെട്ട് നട്ടം തിരിഞ്ഞ സംസ്ഥാന സര്ക്കാരിനും സിപിഐഎമ്മിനും എതിരായ വിധിയെഴുത്ത് തന്നെയാകും തദ്ദേശസ്വയംഭരണ തെരഞ്ഞെടുപ്പ് ഫലമെന്ന ഉറച്ച പ്രതീക്ഷയിലാണ് മുന്നണി.