കോന്നി : പ്രമാടം ഗ്രാമപഞ്ചായത്തിലെ വി കോട്ടയത്ത് കനാലില് വെള്ളം ലഭിക്കാത്തതിനാല് ബുദ്ധിമുട്ടിലായി നാട്ടുകാര്. പതിനാറാം വാര്ഡ് സ്ഥിതി ചെയ്യുന്ന വി കോട്ടയം ജംഗ്ഷനില് ആണ് വെള്ളം ലഭിക്കാത്തത്. കല്ലട ഇറിഗേഷന് പദ്ധതിയുടെ കനാലില് കൂടിയാണ് ഈ ഭാഗത്ത് വെള്ളം ലഭിക്കുന്നത്. എന്നാല് ഈ പ്രദേശം കുറച്ച് ഉയര്ന്ന നിലയിലായതിനാലും കനാല് അടഞ്ഞു കിടക്കുന്നതിനാലും ഏകദേശം നാല് വര്ഷത്തോളമായി ഇവിടെ വെള്ളം ലഭിക്കുന്നില്ല എന്നാണ് നാട്ടുകാര് പരാതി പറയുന്നത്.
കഴിഞ്ഞ കുറച്ചു കാലം മുന്പ് പ്രമാടം ഗ്രാമപഞ്ചായത്തിലെ ജനപ്രതിനിധിയുടെ നേതൃത്വത്തില് കനാല് കാടുകള് തെളിച്ച് വൃത്തിയാക്കുകയും ഈ ഭാഗത്ത് വെള്ളം വരുകയും ചെയ്തിരുന്നു. എന്നാല് ജംഗ്ഷന് ഭാഗത്ത് മാത്രം വെള്ളമെത്തിയില്ല. കനാലില് വെള്ളം ലഭിക്കാതെ വന്നതോടെ കര്ഷകര് അടക്കമുള്ള നിരവധി കുടുംബങ്ങളാണ് പ്രതിസന്ധിയിലായത്. കനാലില് നിന്നും വരുന്ന വെള്ളമാണ് കാര്ഷിക ആവശ്യങ്ങള്ക്കായി പ്രദേശത്തെ ജനങ്ങള് ഉപയോഗിക്കുന്നത്. വേനല് മഴ കാര്യമായി ലഭിക്കാത്തതിനാല് പ്രദേശത്തെ നീരുറവകളും വറ്റി വരണ്ടിട്ടുണ്ട്.
