തൃശ്ശൂര്: ടോറസ് ലോറി കാറിലിടിച്ച ശേഷം കാറിനെ 100 മീറ്ററോളം വലിച്ചു കൊണ്ടു പോയി. തൃശ്ശൂര് കുന്നംകുളത്താണ് സംഭവം. കുന്നംകുളം പാറേമ്പാടത്ത് നടന്ന അപകടത്തില് കാര് യാത്രികരായ ദമ്പതികള് അത്ഭുതകരമായി രക്ഷപ്പെട്ടു. ഇന്ന് വൈകിട്ട് മൂന്നരയോടെയായിരുന്നു അപകടമുണ്ടായത്. പെരിങ്ങോട് സ്വദേശികളാണ് പരിക്കേല്ക്കാതെ രക്ഷപ്പെട്ടത്. ദമ്പതികള് സഞ്ചരിച്ചിരുന്ന കാറിനെ മറികടന്ന ടോറസ്സ് മുന്നില് പോയി കാറില് തട്ടുകയായിരുന്നു. ഇടിയുടെ ആഘാതത്തില് നിയന്ത്രണം വിട്ട കാര് ടോറസ്സിന്റെ മുന്നില് അകപ്പെടുകയായിരുന്നു.
അപകടത്തില്പ്പെട്ട കാറിനെ നൂറ് മീറ്ററിലധികം ദൂരം ടോറസ്സ് ലോറി വലിച്ചിഴച്ചു കൊണ്ടു പോയി. കുന്നംകുളം ഭാഗത്ത് നിന്നും അക്കിക്കാവ് ഭാഗത്തേക്ക് പോവുകയായിരുന്ന കാറും ടോറസ് ലോറിയുമാണ് അപകടത്തില്പ്പെട്ടത്. ഇടിയുടെ ആഘാതത്തില് കാറിന്റെ ഒരു വശത്ത് കേടുപാടുകള് സംഭവിച്ചു.