സാഗര്‍ : കാമുകിയുടെ ബന്ധുക്കള്‍ തീകൊളുത്തിയ യുവാവ് മരണത്തിന് കീഴടങ്ങിയതായി പോലീസ്. മധ്യപ്രദേശിലെ സാഗര്‍ ജില്ലയിലെ ഗ്രാമത്തിലാണ് സംഭവം നടന്നത്. വ്യാഴാഴ്ച രാത്രിയാണ് യുവാവിന് പൊള്ളലേറ്റത്. മരണവുമായി ബന്ധപ്പെട്ട് കാമുകിയുടെ ബന്ധുക്കളായ നാലുപേരെ അറസ്റ്റ് ചെയ്തതായി പോലീസ് സൂപ്രണ്ട് അതുല്‍ സിംഗ് അറിയിച്ചു.
25 വയസുള്ള യുവാവാണ് മരിച്ചത്. 23 വയസുകാരിയുമായി ഇയാള്‍ പ്രണയത്തിലായിരുന്നു. യുവതിക്കും ഗുരുതരമായി പൊള്ളലേറ്റിട്ടുണ്ട്. തന്നെ തീകൊളുത്താന്‍ ശ്രമിക്കുന്നതിനിടയിലാണ് യുവാവിന് പൊള്ളലേറ്റതെന്ന് യുവതി മൊഴി നല്‍കിയിട്ടുണ്ട്. യുവതിയുടെ കുടുംബാംഗങ്ങള്‍ ഇരുവരേയും രക്ഷിക്കാന്‍ ശ്രമിച്ചെങ്കിലും പരാജയപ്പെടുകയായിരുന്നുവെന്ന് പോലീസ് പറയുന്നു.
വെള്ളിയാഴ്ചയാണ് യുവാവ് മരിച്ചത്. വ്യാഴാഴ്ച രാത്രി തനിക്കൊരു കോള്‍ വന്നുവെന്നും കാമുകിയുടെ വീട്ടില്‍ എത്തണമെന്ന് ഫോണില്‍ വിളിച്ചയാള്‍ ആവശ്യപ്പെടുകയായിരുന്നുവെന്നും യുവാവ് നല്‍കിയ മരണമൊഴിയില്‍ പറയുന്നതായി പൊലിസ് പറഞ്ഞു. കാമുകിയുടെ വീട്ടിലെത്തിയ തന്റെ ദേഹത്തേയ്ക്ക് അവളുടെ വീട്ടുകാര്‍ മണ്ണെണ്ണയൊഴിച്ച് തീ കൊളുത്തുകയായിരുന്നുവെന്നും മരണമൊഴിയില്‍ വ്യക്തമാക്കുന്നുണ്ടെന്നും എസ് പി പറഞ്ഞു.
വിവരമറിഞ്ഞെത്തിയ യുവാവിന്റെ ബന്ധുക്കളാണ് അദ്ദേഹത്തെ ആശുപത്രിയിലെത്തിച്ചത്. യുവാവിന്റെ കുടുംബത്തിന്റെ പരാതിയില്‍ കാമുകിയുടെ കുടുംബാംഗങ്ങളായ നാലുപേര്‍ക്കെതിരെ പോലീസ് കേസെടുത്തിരുന്നു. യുവാവിന്റെ മരണത്തെ തുടര്‍ന്ന് പോലീസ് നാലുപേരേയും അറസ്റ്റ് ചെയ്തു.
