കൊച്ചി : ആഗോളതലത്തിൽ യുദ്ധം മൂലം ഉണ്ടായിട്ടുള്ള പാചകവാതക വ്യോമയാന ഗതാഗത പ്രതിസന്ധി പരിഹരിക്കുവാന് അടിയന്തിര ഇടപെടല് ആവശ്യപ്പെട്ട് ഇവന്റ് മാനേജ്മെന്റ് അസോസിയേഷൻ കേരള (ഇമാക്). വിവാഹ സീസണും കോർപ്പറേറ്റ് കോൺഫറൻസുകളും സജീവമാകുന്ന ഈ സമയത്ത് നിലവിലെ സാഹചര്യം മേഖലയെ തകർക്കുന്ന അവസ്ഥയിലാണെന്ന് അസോസിയേഷൻ ഭാരവഹികള് പറഞ്ഞു. ഏതൊരു പരിപാടികളിലെയും പ്രധാന ഘടകം ഭക്ഷണമാണ്. അത് പാചകം ചെയ്യുന്നതിന് ആവശ്യമായ പാചകവാതകം നിലവിൽ ലഭ്യമല്ലാത്തതിനാല് ബുക്ക് ചെയ്ത പ്രോഗ്രാമുകള് പലതും റദ്ദാക്കപ്പെടുകയാണ്.
കേരളത്തിൽ അടുത്തിടെയായി വർധിച്ചുവരുന്ന ഒന്നാണ് ഡെസ്റ്റിനേഷൻ വെഡിങ്. നിലവിൽ വിമാന സർവീസുകൾ പലതും റദ്ദാക്കപ്പെടുകയും വിമാനടിക്കറ്റ് നിരക്ക് വർധനയും ഈ സാധ്യതകളെയും ബാധിച്ചു. കേരളത്തിൽ ഇവന്റ് കൾ നടത്താൻ താല്പര്യപ്പെടുന്ന പുറത്തുള്ള പലരും ഇതിൽ നിന്ന് പിൻവലിയാനും കാരണമാകുന്നുണ്ട്. ഈ പ്രതിസന്ധികൾ കാരണം കേരളത്തിൽ ഇവന്റ് വ്യവസായവുമായി ബന്ധപ്പെട്ട് തൊഴില് ചെയ്യുന്ന മൂന്നു ലക്ഷത്തോളം തൊഴിലാളികളുടെ ഉപജീവനമാർഗ്ഗത്തെ ബാധിച്ചിരിക്കുകയാണെന്ന് അസോസിയേഷൻ സംസ്ഥാന പ്രസിഡന്റ് രാജു കണ്ണമ്പുഴ, ജനറൽ സെക്രട്ടറി ബഹന്നാൻ കെ.അരീക്കൽ, ട്രഷറർ പ്രവീൺ ചന്ദ്രൻ എന്നിവർ പറഞ്ഞു.
