ഫ്രാങ്ക്ഫർട്ട് : ആയിരക്കണക്കിന് അടി ഉയരത്തിൽ വിമാനം പറക്കുന്നതിനിടെ എമർജൻസി എക്സിറ്റ് വാതിൽ തുറക്കാൻ യാത്രക്കാരന്റെ ശ്രമം. കൊളംബിയൻ തലസ്ഥാനമായ ബൊഗോട്ടയിൽ നിന്ന് ജർമനിയിലെ ഫ്രാങ്ക്ഫർട്ടിലേക്ക് പറന്ന ലുഫ്താൻസ വിമാനത്തിലാണ് സഹയാത്രക്കാരെയും ജീവനക്കാരെയും പരിഭ്രാന്തിയിലാക്കിയ സംഭവം. 33 വയസ്സുകാരനായ യാത്രക്കാരൻ പെട്ടെന്ന് അക്രമാസക്തനാകുകയും വിമാനത്തിന്റെ പ്രധാന വാതിലിന്റെ ഹാൻഡിലിൽ പിടിച്ച് ബലമായി തുറക്കാൻ ശ്രമിക്കുകയുമായിരുന്നു. ബോയിങ് 787 ഡ്രീംലൈനർ വിമാനത്തിലായിരുന്നു ഇയാൾ യാത്ര ചെയ്തിരുന്നത്. പെട്ടെന്ന് സീറ്റിൽ നിന്ന് എഴുന്നേറ്റ ഇയാൾ വാതിലിനടുത്തേക്ക് എത്തി ഹാൻഡിലിൽ പിടിച്ച് ബലപ്രയോഗം നടത്തുകയായിരുന്നു.
സ്ഥിതിഗതികൾ മനസ്സിലാക്കിയ വിമാന ജീവനക്കാർ ഉടൻ തന്നെ ഇയാളോട് വാതിലിൽ നിന്ന് മാറിനിൽക്കാൻ ആവശ്യപ്പെട്ടു. എന്നാൽ ആവർത്തിച്ചുള്ള നിർദേശം ഇയാൾ അനുസരിച്ചില്ല. തുടർന്ന് വിമാന ജീവനക്കാരും രണ്ട് സഹയാത്രക്കാരും ചേർന്ന് ഇയാളെ വാതിലിൽ നിന്ന് ബലമായി മാറ്റി നിയന്ത്രണത്തിലാക്കുകയായിരുന്നു. പിന്നീട് സീറ്റിൽ തന്നെ ബന്ധിച്ചാണ് യാത്ര തുടർന്നത്. വിമാനത്തിന്റെ ഉയരത്തിൽ കാബിനിനകത്തും പുറത്തുമുള്ള വായുമർദത്തിലെ വലിയ വ്യത്യാസം നിലനിൽക്കുന്നതിനാൽ വാതിൽ തുറക്കാൻ സാധിക്കാത്തത് കൂടുതൽ ഗുരുതരമായ അപകടം ഒഴിവാക്കുന്നതിൽ നിർണായകമായി.
