കാസര്കോട് വിരുദ്ധ പ്രസ്താവനയില് മാപ്പുപറഞ്ഞ് നിര്മ്മാതാവും പ്രൊഡ്യൂസേഴ്സ് അസോസിയേഷന് പ്രസിഡന്റുമായ എം രഞ്ജിത്. മയക്കുമരുന്ന് ലഭിക്കാന് എളുപ്പമുള്ളതിനാലാണ് സിനിമകള്ക്ക് കാസര്കോട് ലൊക്കേഷനായി തെരഞ്ഞെടുക്കുന്നതെന്ന പ്രസ്താവനയിലാണ് ഖേദം പ്രകടിപ്പിച്ചത്. പറഞ്ഞത് പലരെയും വേദനിപ്പിച്ചെന്ന് മനസ്സിലാക്കുന്നു. അതില് അതിയായ ദുഃഖമുണ്ട്. തെറ്റ് തിരുത്തുക എന്നത് എന്റെ കടമയാണ്. വേദനിപ്പിച്ചതില് ഖേദം പ്രകടിപ്പിക്കുന്നുവെന്നും രഞ്ജിത്ത് പറഞ്ഞു.
കാസര്കോടിനെയോ അവിടെയുള്ള ആളുകളെയോ കുറിച്ചല്ല പറഞ്ഞത്. മറ്റു സംസ്ഥാനങ്ങളില് നിന്നും മയക്കുമരുന്ന് എത്തിക്കാന് എളുപ്പമാകുന്നത് കൊണ്ട് പല ചിത്രീകരണങ്ങളും അവിടെയാകുന്നുണ്ട് എന്ന ആരോപണം ഞങ്ങളുടെ ഒരു യോഗത്തില് തന്നെ ഉന്നയിച്ചിരുന്നു. അത് ഉള്ളില് കിടന്നതുകൊണ്ടാണ് പറഞ്ഞു പോയത്. എന്റെ സുഹൃത്തുക്കളെയും കാസര്കോടുകാരെയും ആ പ്രസ്താവന വേദനിപ്പിച്ചതായി ഞാന് മനസ്സിലാക്കുന്നു. ആരെയെങ്കിലും വേദനിപ്പിച്ചിട്ടുണ്ടെങ്കില് അത് തെറ്റാണെന്ന് ഞാന് തിരിച്ചറിയുന്നു. തെറ്റ് തിരുത്തേണ്ടത് എന്റെ കടമയാണ്. വേദനിപ്പിച്ചതില് ഞാന് ഖേദം പ്രകടിപ്പിക്കുന്നു- എം രഞ്ജിത് പറഞ്ഞു.
