ഇലന്തൂര് : ഇലന്തൂരില് ജനവാസ മേഖലയില് പുലി ഇറങ്ങിയതായി നാട്ടുകാര് ആരോപിക്കുമ്പോള് സംഭവത്തില് സ്ഥിരീകരണം നടത്താതെ വനം വകുപ്പ്. ഇലന്തൂര് മയിലാടുംപാറയ്ക്ക് താഴെ കുളത്തുംമുറി കോട്ടൂര് ഭാഗത്താണ് പുലി ഇറങ്ങിയതായി അഭ്യൂഹം പടരുന്നത്. രാത്രി ഏഴരയ്ക്ക് ശേഷം ഇവിടുത്തെ ഒരു വീടിന്റെ ഗേറ്റിന് സമീപത്ത് കൂടി പുലിയെന്ന് സംശയിക്കുന്ന ജീവി നടന്ന് നീങ്ങുന്നതും വീട്ടില് സ്ഥാപിച്ചിരുന്ന സി.സി.റ്റി.വി ക്യാമറയില് പതിഞ്ഞിട്ടുണ്ട്. സംഭവത്തില് വനം വകുപ്പ് അധികൃതര് ഇതുവരെയും സ്ഥിരീകരണം നടത്തിയിട്ടില്ല.
എന്നാല് സി.സി.റ്റി.വി ക്യാമറയില് പുലിയുടെ ദൃശ്യങ്ങള് പതിഞ്ഞതോടെ വലിയ ഭീതിയിലാണ് പ്രദേശവാസികളായ ജനങ്ങള്. ഇതിനിടെ നാട്ടുകാരുടെ നേതൃത്വത്തില് ഈ പ്രദേശത്ത് തെരച്ചില് നടത്തുകയും ചെയ്തിരുന്നു. ഈ പ്രദേശങ്ങളില് കാടുകയറി കിടക്കുന്ന പറമ്പുകള് വെട്ടിത്തെളിക്കുവാന് സ്വകാര്യ വ്യക്തികള് തയ്യാറാകാത്തത് കാട്ടുപന്നി ഉള്പ്പടെയുള്ള വന്യ ജീവികളുടെ ശല്യത്തിന് കാരണമായി മാറുന്നുവെന്ന് പ്രദേശവാസികള് പറയുന്നു. രാത്രി സമയങ്ങളില് ഇവിടെ വനപാലകര് പെട്രോളിംഗ് ശക്തമാക്കണമെന്നും പ്രദേശവാസികള് ആവശ്യപ്പെടുന്നു.
