കൊച്ചി: മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം.ശിവശങ്കറിന്റെ വാട്സാപ്പ് ചാറ്റ് വിവരങ്ങള് പുറത്ത്. ശിവശങ്കര് പണമിടപാടില് ഇടപെട്ടുവെന്നതിന് ആധാരമായി എന്ഫോഴ്സ്മെന്റ് ഡയറക്ടറേറ്റ് വ്യക്തമാകുന്ന വാട്സാപ്പ് ചാറ്റിലെ വിവരങ്ങളാണ് ഇന്ന് ലഭിച്ചിരിക്കുന്നത്. ചാര്ട്ടേഡ് അക്കൗണ്ടന്റ് വേണുഗോപാലുമായി ശിവശങ്കര് ബന്ധപ്പെട്ടതിന്റെ ചാറ്റ് വിവരങ്ങളാണ് ലഭിച്ചിരിക്കുന്നതും.
സ്വപ്നയെ മറയാക്കി ശിവശങ്കര് പണമിടപാട് നടത്തിയിരുന്നതായി കഴിഞ്ഞ ദിവസം ശിവശങ്കറിന്റെ മുന്കൂര് ജാമ്യാപേക്ഷയെ എതിര്ത്തു കൊണ്ട് ഇഡി ഹൈക്കോടതിയില് പറഞ്ഞിരുന്നു. ഈ ചാറ്റിന്റെ വിശദാംശങ്ങള് ഹൈക്കോടതിയില് ഇഡി സീല് വെച്ച കവറില് സമര്പ്പിക്കുകയും ചെയ്തിരുന്നു. ഈ വാട്സാപ്പ് ചാറ്റിലെ ചില വിവരങ്ങളാണ് ഇപ്പോള് വെളിപ്പെടുത്തിയിരിക്കുന്നത്.
ശിവശങ്കറിന്റെ സുഹൃത്ത് കൂടിയാണ് നികുതി വിദഗ്ദ്ധനും ചാര്ട്ടേഡ് അക്കൗണ്ടന്റുമായ വേണുഗോപാല്. സ്വപ്നയ്ക്ക് വേണ്ടി ലോക്കറില് പണം നിക്ഷേപിച്ചതുമായി ബന്ധപ്പെട്ട കാര്യങ്ങളെല്ലാം ഇരുവരും വാട്സാപ്പില് ചര്ച്ച ചെയ്തിരിക്കുകയാണ്. നിക്ഷേപം ഏതെല്ലാം രീതിയില് കൈകാര്യം ചെയ്യണമെന്നും വേണുഗോപാലില് നിന്നും ശിവശങ്കര് ചോദിക്കുകയുണ്ടായി. 2018 നവംബര് മുതലാണ് ഇരുവരും തമ്മിലുള്ള ചാറ്റിംഗ് തുടങ്ങുന്നത്.
ശിവശങ്കറിനോട് ഇഡി 35 ലക്ഷം രൂപ ബാങ്കില് നിക്ഷേപിച്ചതിനെക്കുറിച്ച് ചോദിച്ചപ്പോള് ഇല്ല എന്നാണ് അദ്ദേഹം മറുപടി നല്കിയിരിക്കുകയാണ്. വേണുഗോപാലുമായി പണമിടപാടിനെക്കുറിച്ച് ചര്ച്ച ചെയ്തിരുന്നുവോ എന്ന് ഇഡി ചോദിച്ചപ്പോഴും അദ്ദേഹം ഇല്ല എന്നാണ് പറഞ്ഞിരിക്കുന്നത്. സ്വപ്നയുടെ പണമിടപാടുകളെ കുറിച്ച് തനിക്ക് യാതൊരു വിവരവുമില്ലെന്നാണ് ഇതിലൂടെ ശിവശങ്കര് സ്ഥാപിക്കാന് ശ്രമിച്ചെതെങ്കിലും ഈ വാദത്തെ എതിര്ക്കുന്ന വിവരങ്ങളാണ് വാട്സാപ്പ് ചാറ്റിലൂടെ ലഭിച്ചിരിക്കുന്നത്.
