കണ്ണൂര് : നിയമസഭ തെരഞ്ഞെടുപ്പില് ഇടതുമുന്നണി കൂടുതല് സ്ത്രീപ്രാതിനിധ്യം ഉറപ്പാക്കണമായിരുന്നുവെന്ന് സിപിഎം പൊളിറ്റ് ബ്യൂറോ അംഗം എം എ ബേബി പറഞ്ഞു. മഹിളാനേതാക്കള് തല മുണ്ഡനം ചെയ്യുന്ന അവസ്ഥയിലേക്ക് കോണ്ഗ്രസ് കൂപ്പുകുത്തി. ശബരിമല വിഷയത്തില് കഴിഞ്ഞുപോയ കാര്യങ്ങളില് തിരിച്ചുപോയി വിവാദമുണ്ടാക്കേണ്ടതില്ല. ഇത്തവണ സമാധാനപരമായി തീര്ഥാടനം നടന്നു, അതാണ് പ്രധാനമെന്നും എം എ ബേബി അഭിപ്രായപ്പെട്ടു.
പുന്നപ്ര-വയലാര് രക്തസാക്ഷി സ്മാരകത്തില് ബിജെപി സ്ഥാനാര്ത്ഥി പോയത് ദുരുദ്ദേശ്യത്തോടെയാണ്. പൂണൂലിട്ട ബ്രാഹ്മണനാണ് എന്ന് വിളിച്ചുപറയുന്ന രാഹുല് ഗാന്ധിക്ക് ബിജെപിയെ എതിര്ക്കാനാകില്ല. കോണ്ഗ്രസ് നിരുത്തരവാദപരമായി പെരുമാറുന്നു എന്നുള്ളതാണ് ഇന്ത്യയില് മതേതരത്വത്തിന് നേരിടേണ്ടിവരുന്ന ഏറ്റവും വലിയ പ്രശ്നം. മൂന്ന് മണ്ഡലങ്ങളില് ബിജെപി സ്ഥാനാര്ത്ഥികളുടെ നാമനിര്ദ്ദേശ പത്രിക തള്ളി. ഒരിടത്ത് അവരുടെ അഖിലേന്ത്യാ പ്രസിഡന്റിന്റെ ഒപ്പില്ല എന്നതായിരുന്നു കാരണം.
ഇതവര്ക്ക് മനസ്സിലാക്കാന് കഴിയാത്ത കാര്യമാണോ. മറ്റൊന്നിനകത്ത് സംസ്ഥാന പ്രസിഡന്റിന്റെ ഒപ്പില്ല എന്നുള്ളതാണ്. സ്വയം ഒരുമിച്ചിരുന്ന് പരിശോധിക്കുമ്പോള് ദൃഷ്ടിയില് പെടേണ്ട വളരെ പ്രകടമായ കുറവുകള് കൊണ്ടാണ് പത്രിക തള്ളിപ്പോയത്. ഇതില് എന്തോ ഗൂഢാലോചനയുണ്ടെന്ന സംശയം പ്രബലമാണെന്നും എം എ ബേബി പറഞ്ഞു.
