കൊച്ചി: മഹാരാജാസ് കോളജില് അധ്യാപകനെ വിദ്യാര്ത്ഥികള് അവഹേളിച്ച സംഭവത്തില് പ്രതികരണവുമായി അധ്യാപകനായ പ്രിയേഷ്. തന്റെ പരിമിതിയെ വിദ്യാര്ത്ഥികള് ദുരുപയോഗം ചെയ്തു. വീഡിയോ എടുത്ത കാര്യം താന് അറിഞ്ഞിരുന്നില്ല. അറിഞ്ഞപ്പോള് ഒരുപാട് വിഷമം വന്നുവെന്നും അധ്യാപകന് പറഞ്ഞു. വിഷയം കോളേജില് തന്നെ തീര്ക്കണം എന്നാണ് ആഗ്രഹം. കുട്ടികള് മാപ്പ് പറഞ്ഞാല് മതിയാകും. കുട്ടികളെ ക്ലാസ്സിലേക്ക് കൊണ്ടു വരണം. സംഭവത്തില്, കെ.എസ്.യു യൂണിറ്റ് വൈസ് പ്രസിഡന്റ് മുഹമ്മദ് ഫാസില് പറഞ്ഞ സംഭവം ഓര്ക്കുന്നില്ല. ക്ലാസില് സ്ഥിരമായി വൈകി വരുന്ന കുട്ടിയാണ് മുഹമ്മദ് എന്നും അധ്യാപകന് പ്രിയേഷ് പറഞ്ഞു.
അതേസമയം, മഹാരാജാസ് കോളജില് കാഴ്ച പരിമിതിയുള്ള അധ്യാപകനെ ക്ലാസ് മുറിയില്വെച്ച് അവഹേളിച്ച സംഭവത്തില് പ്രതിഷേധം ശക്തമാകുകയാണ്. സംഭവത്തില് കെ.എസ്.യു യൂണിറ്റ് വൈസ് പ്രസിഡന്റ് മുഹമ്മദ് ഫാസില് അടക്കം ആറ് വിദ്യാര്ത്ഥികളെ സസ്പെന്ഡ് ചെയ്തിരുന്നു. എന്നാല് മുഹമ്മദ് ഫാസിലിനെ ന്യായികരിച്ച് കെഎസ്യു സംസ്ഥാന അധ്യക്ഷന് അലോഷ്യസ് സേവ്യര് രംഗത്തുവന്നു. ഫാസില് നിരപരാധിയാണ്. ക്ലാസ് കഴിഞ്ഞ ഉടനാണ് ഫാസില് എത്തിയതെന്നും കെഎസ്യു അധ്യാപകന് ഒപ്പം തന്നെയാണെന്നും അലോഷ്യസ് സേവ്യര് പ്രതികരിച്ചു.
