പാൽഘർ: മഹാരാഷ്ട്രയിൽ ഡോക്ടർമാരായ ദമ്പതികൾ സഞ്ചരിച്ചിരുന്ന കാർ ഹൈവേയിലെ ഗാർഡ്റെയിലിൽ ഇടിച്ച് അപകടം. ഇടിയുടെ ആഘാതത്തിൽ വാഹനത്തിനുള്ളിലേക്ക് ലോഹ റെയിലിംഗ് തുളച്ചുകയറിയതിനെത്തുടർന്ന് ദമ്പതികൾക്ക് ഗുരുതരമായി പരിക്കേറ്റു. മുംബൈ-അഹമ്മദാബാദ് ഹൈവേയിൽ പാൽഘറിന് സമീപമാണ് അപകടം നടന്നത്. മുംബൈയിൽ നിന്ന് ഗുജറാത്തിലേക്ക് പോവുകയായിരുന്നു ദമ്പതികൾ. ഇടിയുടെ ആഘാതത്തിൽ 10 മുതൽ 15 അടി വരെ നീളമുള്ള ഗാർഡ് റെയിലിന്റെ ഭാഗം കാറിന്റെ മുൻഭാഗം തുളച്ച് അകത്തേക്ക് കയറി പിന്നിലൂടെ പുറത്തേക്ക് നീണ്ടു. അപകടത്തിൽ വാഹനം സാരമായി തകർന്നു. അതിവേഗത്തിലായിരുന്ന കാർ ഡ്രൈവർക്ക് നിയന്ത്രണം നഷ്ടപ്പെട്ടതാണ് അപകടകാരണമെന്നാണ് പ്രാഥമിക നിഗമനം. തുടർന്ന് വാഹനം ഹൈവേ സുരക്ഷാ ബാരിയറിൽ ഇടിക്കുകയായിരുന്നു.
അപകടവിവരം അറിഞ്ഞതോടെ പ്രദേശവാസികളും ഹൈവേ പോലീസും സ്ഥലത്തെത്തി രക്ഷാപ്രവർത്തനം നടത്തി. കാറിനുള്ളിൽ കുടുങ്ങിയ ഡോക്ടർ ദമ്പതികളെ ഏറെ പരിശ്രമിച്ചാണ് പുറത്തെടുത്തത്. പരിക്കേറ്റ ഇരുവരെയും ഉടൻ സമീപത്തെ ആശുപത്രിയിൽ പ്രവേശിപ്പിച്ചു. വനിതാ ഡോക്ടറുടെ നില ഗുരുതരമായതിനെ തുടർന്ന് കൂടുതൽ ചികിത്സയ്ക്കായി മുംബൈയിലെ സ്വകാര്യ ആശുപത്രിയിലേക്ക് മാറ്റി. സംഭവത്തിൽ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. അപകടത്തിന്റെ കൃത്യമായ കാരണം കണ്ടെത്താനുള്ള നടപടികൾ പുരോഗമിക്കുകയാണ്.
