തിരുവനന്തപുരം : നഗരത്തിൽ സിറ്റി ഡാൻസാഫ് സംഘം നടത്തിയ മിന്നൽ പരിശോധനയിൽ 10 കിലോ കഞ്ചാവ് പിടികൂടി. നഗരത്തിലെ ഈഞ്ചക്കലിൽ വെച്ച് ബൈക്കിൽ ലഹരിമരുന്ന് കടത്താൻ ശ്രമിച്ച പ്രായപൂർത്തിയാകാത്ത ഒരാളടക്കം രണ്ടുപേരെയാണ് പോലീസ് രഹസ്യാന്വേഷണ വിഭാഗം പിടികൂടിയത്. പ്രതികളെ പിന്നീട് ഫോർട്ട് പോലീസിന് കൈമാറി. സംസ്ഥാനത്ത് ലഹരി മാഫിയയെ അടിച്ചമർത്തുന്നതിനായി ആവിഷ്കരിച്ച ‘ഓപ്പറേഷൻ തൂഫാൻ: ദി നാർക്കോ ഹണ്ട്’ എന്ന പുതിയ പദ്ധതിയുടെ ഭാഗമായാണ് നഗരത്തിൽ പരിശോധനകൾ ശക്തമാക്കിയത്.
സിറ്റി പോലീസ് കമ്മീഷണർ കെ. കാർത്തിക്കിന്റെ നിർദ്ദേശപ്രകാരം ഇന്നലെ രാത്രി മുതൽ നഗരത്തിലാകെ കർശനമായ കോമ്പിംഗ് നടന്നു വരികയായിരുന്നു. പുലർച്ചെ സമയങ്ങളിൽ പോലീസിന്റെ പരിശോധന ഉണ്ടാകില്ലെന്ന കണക്കുകൂട്ടലിലാണ് പ്രതികൾ ബാഗിനുള്ളിൽ കഞ്ചാവുമായി ബൈക്കിൽ യാത്ര ചെയ്തത്. ആന്ധ്രാപ്രദേശ് പോലുള്ള ഇതര സംസ്ഥാനങ്ങളിൽ നിന്ന് വൻതോതിൽ എത്തിക്കുന്ന കഞ്ചാവ് വിതരണം ചെയ്യുന്ന സംഘത്തിലെ കണ്ണികളാണ് ഇവരെന്ന് പോലീസ് സംശയിക്കുന്നു.
