പാലക്കാട്: മലമ്പുഴ ഡാം ഷട്ടര് ഇന്ന് വൈകീട്ട് 3 മണിക്ക് തുറക്കുമെന്ന് അധികൃതര് അറിയിച്ചു. നാല് ഷട്ടറുകള് 30 സെന്റീമീറ്റര് വീതമാണ് തുറക്കുന്നത്. മുക്കൈപ്പുഴ, കല്പ്പാത്തിപ്പുഴ, ഭാരതപ്പുഴ തീരത്തുള്ളവര് ജാഗ്രത പാലിക്കണമെന്ന് കളക്ടര് അറിയിച്ചു. ഇടുക്കി മുല്ലപ്പെരിയാര് ഡാമിലെ ജലനിരപ്പ് 134. 90 അടിയായി ഉയര്ന്നു. കനത്ത മഴയെ തുടര്ന്ന് ജലനിരപ്പ് അപ്പര് റൂള് ലവലിലെത്തിയാല് സ്പില് വേ ഷട്ടര് തുറന്നേക്കും. പെരിയാറിന്റെ തീരത്തുള്ളവര് ജാഗ്രത പാലിക്കണമെന്ന് അധികൃതര് അറിയിച്ചു.
റൂള് കര്വ് അനുസരിച്ച് ജൂലൈ 19 വരെ 136. 30 അടിയാണ് പരമാവധി സംഭരിക്കാവുന്ന ജലനിരപ്പ്. ഡാമിലെ ജലനിരപ്പ് ഉയരുന്നതിനെ തുടര്ന്ന് മഞ്ചുമല വില്ലേജ് ഓഫീസില് കണ്ട്രോള് റൂം തുറന്നിട്ടുണ്ട്. ആശങ്ക വേണ്ടെന്നും ജാഗ്രത പാലിച്ചാല് മതിയെന്നും ജില്ലാ കളക്ടര് അറിയിച്ചു. 1844 ഘനയടി വെള്ളമാണ് തമിഴ്നാട് എടുക്കുന്നത്. സെക്കന്റില് 7000 ഘനയടിയിലധികം വെള്ളം അണക്കെട്ടിലേക്ക് ഒഴുകിയെത്തുന്നുണ്ടെന്നാണ് കണക്ക്.
