പത്തനംതിട്ട : ജില്ലാ ഭരണകൂടവും വിവര പൊതുജനസമ്പര്ക്ക വകുപ്പും സംയുക്തമായി ജില്ലയില് നവംബര് ഒന്നു മുതല് നവംബര് ഏഴു വരെ ഭരണഭാഷാവാരാഘോഷവും മലയാളദിനവും സംഘടിപ്പിക്കും. ജില്ലാതല ഉദ്ഘാടനം നവംബര് ഒന്നിന് രാവിലെ 10 ന് കളക്ടറേറ്റ് കോണ്ഫറന്സ് ഹാളില് ജില്ലാ കളക്ടര് എസ് പ്രേം കൃഷ്ണന് നിര്വഹിക്കും. എഡിഎം ബി ജ്യോതി അധ്യക്ഷത വഹിക്കും. കവിയും ആകാശവാണി മുന് പ്രോഗ്രാം അസിസ്റ്റന്റ് ഡയറക്ടറുമായ ശ്രീകുമാര് മുഖത്തല മുഖ്യാതിഥിയായി പങ്കെടുക്കും. ജില്ലാ നിയമ ഓഫീസര് കെ സോണിഷ് ഭരണഭാഷ പ്രതിജ്ഞ ചൊല്ലും.
ജില്ലാ ഭരണഭാഷ പുരസ്ക്കാര ജേതാവിനെ ചടങ്ങില് പ്രഖ്യാപിക്കും. തുടര്ന്ന് ജില്ലയിലെ സര്ക്കാര് ജീവനക്കാര്ക്കായി മലയാള ഭാഷ, സംസ്കാരം, ചരിത്രം എന്നീ വിഷയങ്ങളെ കുറിച്ച് പ്രശ്നോത്തരി സംഘടിപ്പിക്കും. ജില്ലാ ഇന്ഫര്മേഷന് ഓഫീസര് സി ടി ജോണ്, ഡെപ്യൂട്ടി കളക്ടര്മാരായ ബീന എസ് ഹനീഫ്, ആര് രാജലക്ഷ്മി, ആര് ശ്രീലത, മിനി തോമസ്, കെ എച്ച് മുഹമ്മദ് നവാസ് തുടങ്ങിയവര് പങ്കെടുക്കും.
