മസ്കറ്റ്: പ്രവാസികള്ക്ക് മലയാളം ഭാഷാ പഠനത്തിന് സൗകര്യം ഒരുക്കുന്നതിനായി സംസ്ഥാന സര്ക്കാര് ആവിഷ്ക്കരിച്ചിരിക്കുന്ന മലയാളം മിഷന് പദ്ധതിക്ക് നാളെ ഒമാനിലെ മസ്കറ്റില് തുടക്കം കുറിക്കുകയാണ്. ഇന്ത്യന് സോഷ്യല് ക്ലബ് ഒമാന്, കേരളവിഭാഗത്തിന്റെ എം ബി ഡിയിലുള്ള ഓഫീസില് രാവിലെ 10 മണിക്കാണ് പ്രവേശനോത്സവം നടക്കുക. എവിടെയെല്ലാം മലയാളിയുണ്ടോ അവിടെയെല്ലാം മലയാള ഭാഷയും വളരണം എന്ന ലക്ഷ്യം മുന്നിര്ത്തി പ്രവര്ത്തിക്കുന്ന അനവധി ചാപ്റ്ററുകളില്, ഏറ്റവും മികച്ച പ്രവര്ത്തനം കാഴ്ച വയ്ക്കുന്ന ഒന്നാണ് ഒമാന് ചാപ്റ്റര്.
ഒമാന് ചാപ്റ്ററിന്റെ ഭാഗമായി പ്രവര്ത്തിച്ചു വന്നിരുന്ന ഭാഷാ പഠന കേന്ദ്രങ്ങള്, കൊവിഡ് മഹാമാരിയുടെ ഘട്ടത്തില് ഓണ്ലൈന് ക്ലാസുകളിലേക്കു മാറിയിരുന്നു. നിലവില് കൊവിഡ് നിയന്ത്രണങ്ങള് ഏറെക്കുറെ പൂര്ണമായും പിന്വലിച്ച സാഹചര്യത്തില് ക്ലാസ്സുകള് നേരിട്ട് ആരംഭിക്കുകയാണ് മലയാള മിഷന് ഒമാന് ചാപ്റ്റര്. അതിന്റെ പ്രാരംഭമെന്ന നിലയില്, കോവിഡാന്തര കാലത്തെ, മസ്കറ്റ് മേഖലയിലെ ആദ്യ ഭാഷാ പഠനകേന്ദ്രത്തിലേക്കുള്ള വിദ്യാര്ത്ഥി പ്രവേശനത്തിനാണ് ശനിയാഴ്ച തുടക്കമാവുന്നത്.
