കോട്ടയം: അനില് കെ.ആന്റണി ബിജെപിയില് ചേര്ന്നതിന് എ.കെ.ആന്റണിയെ അധിക്ഷേപിക്കുന്നതില് വിമര്ശനവുമായി എഐസിസി സെക്രട്ടറി പി.സി.വിഷ്ണുനാഥ്. ഇന്നലത്തെ മഴയില്ക്കുരുത്ത തകരയല്ല ആന്റണിയെന്നും അദ്ദേഹത്തെ വ്യക്തിഹത്യ ചെയ്യുന്നത് അദ്ദേഹത്തിന്റെ ജീവിതമൂല്യങ്ങളോടും ചരിത്രത്തോടും ചെയ്യുന്ന പാതകമാണെന്നും വിഷ്ണുനാഥ് പറഞ്ഞു. 6 പതിറ്റാണ്ടു നീണ്ട പൊതുജീവിതത്തില് സംശുദ്ധിയും സത്യസന്ധതയും ഉയര്ത്തിപ്പിടിച്ച വ്യക്തിത്വത്തെ ഒറ്റതിരിഞ്ഞ് സൈബര് അക്രമണം നടത്തുന്നത് നീതീകരിക്കാനാവില്ലെന്നു വിഷ്ണുനാഥ് ഫെയ്സ്ബുക് കുറിപ്പില് വ്യക്തമാക്കി.
ആന്റണിയെ സ്ഥാനങ്ങളില് അവരോധിക്കാന് ഒരു ഗോഡ്ഫാദറും ഒരിക്കലും ഉണ്ടായിട്ടില്ല. കിട്ടിയ സ്ഥാനങ്ങളില് ഒരിക്കല്പോലും ആന്റണി അള്ളിപ്പിടിച്ചിരുന്നിട്ടുമില്ല. ഇനിയും അദ്ദേഹത്തെ ഒറ്റതിരിഞ്ഞ് അക്രമിക്കുന്നത് ക്രൂരവും ചരിത്ര നിരാസവുമാകും- വിഷ്ണുനാഥ് അഭിപ്രായപ്പെട്ടു.
