കുവൈറ്റ്: കാന്‍സര്‍ ബാധിതയായ മലയാളി നഴ്‌സ് കൊവിഡ് ബാധിച്ച്‌ മരിച്ചു. എസ്‌എംസിഎ സാല്‍മിയ ഏരിയ സെന്റ് ജോര്‍ജ്ജ് ഫാമിലി യൂണിറ്റ് അംഗവും മുന്‍ കേന്ദ്ര കമ്മിറ്റി അംഗവും ഏരിയ കമ്മിറ്റി അംഗവുമായിരുന്ന മനോജ് മാത്യു നിരപ്പേലിന്റെ ഭാര്യ ലൗലി മനോജ് ആണ് മരിച്ചത്.
മൃതദേഹം കൊവിഡ് പ്രോട്ടോക്കോള്‍ പ്രകാരം ഇന്ന് രാവിലെ 7 മണിക്ക് സുലൈബിക്കാത്ത് ശ്മശാനത്തില്‍ സംസ്‌ക്കരിച്ചു. ചങ്ങനാശ്ശേരി അതിരൂപത കുറുമ്പനാടം അസംപ്ഷന്‍ ചര്‍ച്ച്‌ ഇടവകാംഗമാണ്. മെല്‍വിന്‍, മേവിന്‍, മെലിന്‍ എന്നിവര്‍ മക്കളാണ്.
കഴിഞ്ഞ മൂന്നു വര്‍ഷമായി അര്‍ബുദ രോഗത്തിന് ചികിത്സയിലായിരുന്നു. മൂന്നു മാസം മുമ്പ് കോവിഡ് ബാധിതയായെങ്കിലും രോഗമുക്തി നേടിയിരുന്നു. തുടര്‍ന്ന് കാന്‍സര്‍ ചികിത്സയിലിരിക്കെയാണ് കഴിഞ്ഞ ദിവസം വീണ്ടും കൊവിഡ് പോസിറ്റീവാണെന്ന് സ്ഥിരീകരിക്കുന്നത്. തുടര്‍ന്ന് മരണം സംഭവിക്കുകയായിരുന്നു.
