കേരളത്തില് പ്ലസ് ടു (സയന്സ്) പഠനത്തിനുശേഷം ജര്മനിയില് നഴ്സിങ് ബിരുദ കോഴ്സുകള്ക്കു ചേരാന് വിദ്യാര്ഥികളെ സഹായിക്കുന്ന നോര്ക്ക റൂട്ട്സ് ട്രിപ്പിള് വിന് ട്രെയിനി പ്രോഗ്രാമിനു തുടക്കമായി. ഇത് സംബന്ധിച്ച് നോര്ക്ക സെന്ററില് നടന്ന ചടങ്ങില് നോര്ക്ക റൂട്ട്സ് സി.ഇ.ഒ കെ. ഹരികൃഷ്ണന് നമ്പൂതിരിയും ജര്മന് ഫെഡറല് എംപ്ലോയ്മെന്റ് ഏജന്സി ഇന്റര്നാഷനല് റിലേഷന്സ് ഡയറക്ടര് അലക്സാണ്ടര് വില്ഹെമും ഓണ്ലൈനായി കരാറില് ഒപ്പിട്ടു. കേരളത്തില് നിന്നുളള തൊഴില്കുടിയേറ്റത്തിലെ വലിയ വഴിത്തിരിവാണ് പ്രോഗ്രാമെന്ന് നോര്ക്ക റസിഡന്റ് വൈസ്ചെയര്മാന് പി. ശ്രീരാമകൃഷ്ണന് പറഞ്ഞു. പദ്ധതിവഴി കേരളത്തില് സയന്സ് വിഭാഗത്തില് പ്ലസ് ടു പഠനം പൂര്ത്തിയാക്കിയ വിദ്യാര്ഥികള്ക്കാണ് ജര്മനിയില് നഴ്സിങ് ബിരുദ പഠനത്തിനും തുടര്ന്ന് ജോലിക്കും അവസരം.
തിരഞ്ഞെടുക്കപ്പെടുന്നവര്ക്ക് ജര്മന് ഭാഷയില് ബി2 വരെയുളള പരിശീലനം പൂര്ണ്ണമായും സൗജന്യമായിരിക്കും. രാജ്യത്ത് ആദ്യമായാണ് സംസ്ഥാന സര്ക്കാര് സ്ഥാപനവുമായി ഇത്തരമൊരു കരാറെന്നും ഈ വര്ഷാവസാനത്തോടെ ആദ്യ ബാച്ചിനെ തിരഞ്ഞെടുക്കാനാകുമെന്നാണ് പ്രതീക്ഷിക്കുന്നതെന്നും ഹരികൃഷ്ണന് നമ്പൂതിരി പറഞ്ഞു. കേരളത്തില് നിന്നും ജര്മനിയിലേയ്ക്കുളള നഴ്സിങ് റിക്രൂട്ട്മെന്റ് പദ്ധതിയായ ട്രിപ്പിള് വിന് മാതൃകയില് നോര്ക്ക റൂട്ട്സും ജര്മ്മന് ഫെഡറല് എംപ്ലോയ്മെന്റ് ഏജന്സിയും ജര്മ്മന് ഏജന്സി ഫോര് ഇന്റര്നാഷനല് കോ-ഓപ്പറേഷനും സംയുക്തമായാണ് ട്രെയിനി പ്രോഗ്രാമും സംഘടിപ്പിക്കുന്നത്. ഈ പദ്ധതിയിലൂടെ തികച്ചും സൗജന്യമായി ജര്മനിയില് പഠിക്കാന് അവസരം ലഭ്യമാകും. കൂടാതെ പഠന കാലയളവില് (3 വര്ഷം) 900 മുതല് 1300 യുറോ വരെ പ്രതിഫലവും ലഭിക്കാന് അവസരമുണ്ട്.
