മല്ലപ്പള്ളി: മല്ലപ്പള്ളി ടൗണിൽ ചപ്പുചവറുകൾ നിറയുന്നു. വൈദ്യുതത്തൂണുകൾക്ക് ചുറ്റും കടകളിലെ അവശിഷ്ടങ്ങൾ കൂട്ടുകയാണ്. ഒഴിഞ്ഞ പ്ലാസ്റ്റിക് കവറുകൾ മുതൽ കാർഡ്ബോർഡ് പെട്ടികൾ വരെ ഇങ്ങനെ ഉപേക്ഷിക്കുന്നവയിൽ ഉൾപ്പെടുന്നു.
കോട്ടയം-കോഴഞ്ചേരി സംസ്ഥാനപാതയുടെ വശങ്ങളിലെ നടപ്പാതകളിൽ മാലിന്യം കൂടുന്നതിനാൽ നടന്നുപോകാൻ പറ്റാത്തസ്ഥിതിയാണ്. ചിലയിടത്ത് ഇരുചക്രവാഹനങ്ങളുടെ പാർക്കിങ് ഇടമായും ഉപയോഗിക്കുന്നു. കടകളിലെ മാലിന്യം ഉടമകൾ തന്നെ സംസ്കരിക്കണമെന്ന് നിർദേശിച്ചിട്ടുള്ളതായി പഞ്ചായത്ത് പ്രസിഡന്റ് പറയുന്നു. ഇക്കാര്യം അംഗീകരിച്ചശേഷമാണ് കടകൾക്ക് പ്രവർത്തനാനുമതി നൽകുന്നത്. ചട്ടംലംഘിക്കുന്നവർക്കെതിരേ നടപടിയെടുക്കുമെന്ന് അദ്ദേഹം അറിയിച്ചു.
കോവിഡ് കാലത്ത് കടകളിൽ കാര്യമായ പരിശോധന നടക്കുന്നില്ല. അതിനാൽ നിരോധിക്കപ്പെട്ട പ്ലാസ്റ്റിക് കവറുകളുടെ ഉപയോഗവും വർധിച്ചിട്ടുണ്ട്. കുറഞ്ഞ നിലവാരത്തിലുള്ള കവറുകൾ നൽകുന്നില്ലെന്ന് കടകളിൽ ബോർഡ് വച്ചിട്ടുണ്ടെങ്കിലും നടപ്പാക്കുന്നില്ല.
