ശബരിമല : മണ്ഡല മകരവിളക്കു തീർഥാടനവുമായി ബന്ധപ്പെട്ട ക്രമീകരണങ്ങളും മുന്നൊരുക്കങ്ങളും വിലയിരുത്തുന്നതിനായി മുഖ്യമന്ത്രി വി.ഡി.സതീശൻ, മന്ത്രി കെ.മുരളീധരൻ എന്നിവരുടെ നേതൃത്വത്തിൽ പമ്പയിൽ. വൈകിട്ട് 4 ന് സന്നിധാനത്തെ മുന്നൊരുക്കങ്ങൾ പരിശോധിക്കും. 5 ന് മുഖ്യമന്ത്രി ക്ഷേത്ര ദർശനം നടത്തും. തുലാമാസ പൂജയ്ക്ക് ഇന്നു വൈകിട്ട് 5 നു തന്ത്രി കണ്ഠര് ബ്രഹ്മദത്തന്റെ സാന്നിധ്യത്തിൽ മേൽശാന്തി ഇ.ഡി.പ്രസാദ് നമ്പൂതിരി നട തുറക്കും.
22 വരെ പൂജകൾ ഉണ്ടാകും. നാളെയാണ് ശബരിമല അയ്യപ്പ ക്ഷേത്രത്തിലെയും മാളികപ്പുറത്തെയും പുതിയ മേൽശാന്തിമാരെ തിരഞ്ഞെടുക്കാനുളള നറുക്കെടുപ്പ് സന്നിധാനത്തു നടക്കുക. ദർശനത്തിനു മണ്ഡലകാലത്തെ പോലെയുള്ള വലിയ തിരക്ക് ഉണ്ടാകുമെന്നാണു വെർച്വൽ ബുക്കിങ് നൽകുന്ന സൂചന. ഇന്ന് 30,000, നാളെ 50,000, 19ന് 42,540 വരെ ബുക്കിങ് കഴിഞ്ഞു. സാധാരണ നട തുറക്കുന്ന ദിവസം പരമാവധി 10,000 പേർക്കാണു വെർച്വൽ ക്യു നൽകാറുള്ളത്. ഇതിനുപുറമേ സ്പോട് ബുക്കിങ് കൂടി വരുന്നതോടെ തിരക്ക് ക്രമാതീതമായി വർധിക്കാനാണു സാധ്യത.
