പത്തനംതിട്ട : മണ്ഡലകാലം ആരംഭിച്ച് ഒരാഴ്ച്ചയാകുമ്പോള് ശബരിമലയില് നിന്നുള്ള വരുമാനം ആറു കോടിയിലധികം രൂപ. ശര്ക്കര വിവാദം അരവണയുടെയും അപ്പത്തിന്റെയും വില്പനയെ കാര്യമായി ബാധിച്ചിട്ടില്ല. ലേലം പോയിട്ടില്ലാത്തതിനാല് നാളികേരം ദിവസവും വൈകുന്നേരം തൂക്കി വില്ക്കുകയാണ്. പലതവണ ലേലം നടത്തിയെങ്കിലും നാളികേരത്തിന്റെ കരാര് ഏറ്റെടുക്കാന് ആരും തയാറായില്ല.
മുന് വര്ഷങ്ങളിലെ നഷ്ടവും തീര്ഥാടകര് എത്തുമോ എന്ന ആശങ്കയുമാണ് ലേലം കൊള്ളാതിരിക്കാനുള്ള കാരണം. പതിനെട്ടാം പടിക്ക് താഴെ ഉടയ്ക്കുന്ന തേങ്ങ, ആഴിയില് നിക്ഷേപിച്ച ശേഷമുള്ള നെയ്തേങ്ങ മുറി, മാളികപ്പുറത്ത് ഉരുട്ടുന്ന തേങ്ങ എന്നിവ ശേഖരിച്ച് ഓരോ ദിവസവും നട അടച്ചശേഷം സന്നിധാനത്തുവച്ചു തന്നെ തൂക്കിവില്ക്കുകയാണിപ്പോള്.
ഒരു കോടിയിലധികം രൂപയാണ് മണ്ഡലകാലത്തിന്റെ ആദ്യ ആഴ്ച്ച കാണിക്കയായി ലഭിച്ചത്. ഒന്നേകാല് ലക്ഷം ടിന് അരവണയും അന്പതിനായിരം പാക്കറ്റ് അപ്പവും വിറ്റുപോയി. ഒന്നെകാല് കോടി രൂപയാണ് ഈ വകയിലെ വരുമാനം. ലോകമെമ്പാടുമുള്ള അയ്യപ്പഭക്തര്ക്ക് ഓണ്ലൈനായി സംഭാവനകള് നല്കാനുള്ള സംവിധാനവും ദേവസ്വംബോര്ഡ് ക്രമീകരിച്ചിട്ടുണ്ട്.