കോട്ടയം: പാലായില് എന്സിപി നേതാവ് മാണി സി കാപ്പന് യുഡിഎഫ് സ്ഥാനാര്ത്ഥിയാകുമെന്ന പി ജെ ജോസഫിന്റെ പ്രസ്താവനയ്ക്ക് മറുപടിയുമായി മാണി സി കാപ്പന്. ജോസഫ് പറഞ്ഞതിനെ കുറിച്ച് അറിയില്ലെന്നായിരുന്നു മാണി സി കാപ്പന്റെ പ്രതികരണം. പാലാ സീറ്റ് ജോസഫ് വിഭാഗം മാണി സി കാപ്പന് വിട്ടുനല്കും. എന്സിപിയായി തന്നെ കാപ്പന് മത്സരിക്കുമെന്നുമായിരുന്നു ജോസഫിന്റെ പ്രതികരണം. എന്നാല് താനും എന്സിപിയും നിലവില് എല്ഡിഎഫില് തന്നെയാണെന്നായിരുന്നു കാപ്പന്റെ പ്രതികരണം.
തദ്ദേശ തിരഞ്ഞെടുപ്പില് മിന്നും വിജയം നേടിയ കേരള കോണ്ഗ്രസ് ജോസ് വിഭാഗതത്തിന് ഉചിതമായ മറുപടി നല്കാനാകും എന്ന പ്രതീക്ഷയിലാണ് പി.ജെ ജോസഫ്. തങ്ങളുടെ പാല സീറ്റ് തന്നെ എന്സിപിക്ക് നല്കുമെന്നായിരുന്നു ജോസഫിന്റെ വാഗ്ദാനം. മാണി സി കാപ്പനെ യുഡിഎഫിലേക്ക് ക്ഷണിച്ച ജോസഫ്, കാപ്പന് പാലായില് യുഡിഎഫ് സ്ഥാനാര്ത്ഥിയാകുമെന്ന് ആവര്ത്തിക്കുകയായിരുന്നു.
എന്നാല് ജോസഫ് പറഞ്ഞതിനെ കുറിച്ച് അറിയില്ലെന്നായിരുന്നു മാണി സി കാപ്പന്റെ പ്രസ്താവന. ജോസഫ് കുടുംബ സുഹൃത്താണെന്ന പറഞ്ഞ കാപ്പന് പക്ഷേ ജോസഫിന്റെ വാദം നിഷേധിച്ചില്ല. ജോസഫ് പറഞ്ഞതിനോട് പ്രതികരിക്കാനില്ലെന്ന നിലപാടിലാണ് എന്സിപി സംസ്ഥാന നേതൃത്വം.
അതേസമയം യുഡിഎഫ് നേതാക്കള് മാണി സി കാപ്പനുമായി ചര്ച്ച നടത്തുന്നുണ്ടെന്നാണ് വിവരം. ജോസ് കെ മാണി വിഭാഗത്തെ യുഡിഎഫില് നിന്ന് അടര്ത്തിയെടുത്തതിന് പകരമായി എല്ഡിഎഫില് നിന്നൊരു ഘടകകക്ഷിയെ കൊണ്ടുവരാന് കോണ്ഗ്രസിലെ മുതിര്ന്ന നേതാക്കള് ഇടപെട്ടുള്ള ചര്ച്ചകളും പുരോഗമിക്കുന്നുണ്ട്. എന്സിപി ദേശീയ നേതൃത്വം കോണ്ഗ്രസിന്റെ ഘടകക്ഷിയാണ്.
