കോട്ടയം: പാലാ സീറ്റ് വിട്ടുനല്കില്ലെന്ന് ആവര്ത്തിച്ച് മാണി സി. കാപ്പന് എം.എല്.എ. കുട്ടനാട്ടില് നീന്താന് അറിയില്ലെന്നും അതുകൊണ്ടു പാലാ വിടില്ലെന്നും മാണി സി.കാപ്പന് പറഞ്ഞു. എന്തു വന്നാലും പാലാ സീറ്റ് വിട്ടുകൊടുക്കില്ലെന്ന് കാപ്പന് നേരത്തെയും വ്യക്തമാക്കിയിരുന്നു. പാലാ, കാഞ്ഞിരപ്പള്ളി സീറ്റുകള് ജോസ് കെ. മാണിക്ക് നല്കാന് എല്.ഡി.എഫില് ധാരണയായതുമായി ബന്ധപ്പെട്ടായിരുന്നു കാപ്പന്റെ പ്രതികരണം.
തോറ്റ പാര്ട്ടിക്ക് സീറ്റ് വിട്ടു നല്കേണ്ട ഗതികേട് എന്.സി.പിക്കില്ല. എന്.സി.പിയിലെ വിമത യോഗം അസാധാരണമാണ്. താന് ശശീന്ദ്രനെതിരെ പരാതി നല്കിയിട്ടില്ല. സീറ്റ് നല്കില്ലെന്ന് മുഖ്യമന്ത്രി പറഞ്ഞിട്ടില്ലെന്നും മാണി സി. കാപ്പന് പറഞ്ഞു.
അതേസമയം സിറ്റിങ് സീറ്റായ പാലാ ഉറപ്പിക്കാനായി കാപ്പന് മുംബൈയിലേക്ക് പോകുമെന്ന് റിപ്പോര്ട്ടുണ്ട്. എന്.സി.പി ദേശീയ അധ്യക്ഷന് ശരത് പവാറുമായി കൂടിക്കാഴ്ച നടത്തുന്നതിനാണ് കാപ്പന് മുംബൈക്ക് പോകുന്നത്. സീറ്റ് ലഭിച്ചില്ലെങ്കില് മുന്നണി മാറണമെന്ന് നിര്ദ്ദേശം മുന്നോട്ട് വെക്കും.