തിരുവനന്തപുരം : യുഡിഎഫ് വിട്ട് എന്‍സിപിയിലേയ്ക്ക് മടങ്ങുമെന്ന വാര്‍ത്ത നിഷേധിച്ച്‌ പാലാ എംഎല്‍എ മാണി സി കാപ്പന്‍. യുഡിഎഫ് വിടുന്നതുമായി ബന്ധപ്പെട്ട് ഒരു ചര്‍ച്ചയും നടത്തിയിട്ടില്ലെന്നും അദ്ദേഹം പറഞ്ഞു. ‘എന്‍സിപി ദേശീയ അദ്ധ്യക്ഷന്‍ ശരദ് പവാറുമായി കൂടിക്കാഴ്ച നടത്തിയത് സത്യമാണ്. ഇന്നും കാണും, നാളെയും കാണും. യുഡിഎഫിനെ ചില പരാതികള്‍ അറിയിച്ചിട്ടുണ്ട്’ – മാണി സി കാപ്പന്‍ പറഞ്ഞു. വനംമന്ത്രി എ.കെ ശശീന്ദ്രനെ മാറ്റി മാണി സി കാപ്പനെ മന്ത്രിയാക്കാമെന്ന് വാഗ്ദ്ധാനം നല്‍കിയെന്നും അതിനാല്‍ അദ്ദേഹം എന്‍സിപിയിലേയ്ക്ക് മടങ്ങിയെത്തിയേക്കുമെന്നുമാണ് റിപ്പോര്‍ട്ടുകള്‍ പുറത്തുവന്നത്. എന്‍സിപി സംസ്ഥാന അദ്ധ്യക്ഷന്‍ പി.സി ചാക്കോ മുന്‍കൈയെടുത്താണ് നീക്കങ്ങളെന്നാണ് വിവരം. പി.സി ചാക്കോയുമായും ശരദ് പവാറുമായും മാണി സി കാപ്പന്‍ കൂടിക്കാഴ്ച നടത്തിയിരുന്നെന്നും റിപ്പോര്‍ട്ടില്‍ പറഞ്ഞിരുന്നു.
