പെരുമ്പെട്ടി : മണിമലയാർ വറ്റിവരളുന്നു. ജലനിരപ്പ് ക്രമാതീതമായി താഴ്ന്നാൽ കോട്ടാങ്ങൽ പഞ്ചായത്തിലെ പെരുമ്പാറ ശുദ്ധജല വിതരണ പദ്ധതിയെ ബാധിച്ചേക്കും. ശാസ്താംകോയിക്കലുള്ള പമ്പിങ് സ്റ്റേഷനിൽ നിന്ന് പൂങ്കുറിഞ്ഞി ബൂസ്റ്റർ പമ്പ് ഹൗസിലേക്കും അവിടെ നിന്ന് പെരുമ്പാറ സംഭരണിയിലേക്കും ജലം എത്തുന്നത്. ശാസ്താംയോയിക്കലിൽ മണിമലയാറിന്റെ തീരത്തെ പ്രധാന കിണറിൽ ജലനിരപ്പ് താഴ്ന്നതിനാൽ ആറിന്റെ മധ്യത്തിലുള്ള ബേബി കിണറിന്റെ സമീപത്തു നിന്നും 10 കുതിരശക്തിയുള്ള മോട്ടർ ഉപയോഗിച്ച് പ്രധാന കിണറിലേക്ക് ജലം പമ്പുചെയ്യുകയാണ്.
ഇവിടത്തെ താൽക്കാലിക തടയണയിൽ തടയാൻ നാമമാത്രമായ ജലമൊഴുക്ക് മാത്രമാണുള്ളത്. ഇവിടെ ബേബിക്കിണറിന് സമീപവും ഇപ്പോൾ മാലിന്യവും ചപ്പും കാടും വന്നടിഞ്ഞ നിലയിലാണ്. ബേബി കിണറിപ്പോൾ ആറിന്റെ മധ്യത്തിൽ 5 അടിയിലധികം ഉയർന്നുനിൽക്കുന്ന നിലയിലാണ്. വേനൽ കനത്താൽ ഇവിടെ നിന്ന് പമ്പിങ് മുടങ്ങിയേക്കുമെന്ന ആശങ്കയുയരുന്നു. മുൻവർഷങ്ങളിൽ ബേബികിണർ ശുചീകരിച്ച് അതിനുള്ളിൽ നിന്നുമായിരുന്നു പ്രധാന കിണറിലേക്ക് ജലം പമ്പുചെയ്തിരുന്നത്. ഇത്തവണ ഇവിടെ ഉപകിണറിലെ മണ്ണും ചെളിയും നീക്കം ചെയ്യുന്ന പ്രവൃത്തികൾപോലും പൂർത്തിയാക്കിയിട്ടില്ല.
