ഇംഫാല്: മണിപ്പൂരില് വംശീയ സംഘര്ഷങ്ങളില് ജീവന് നഷ്ടപ്പെട്ടവര്ക്ക് നഷ്ടപരിഹാര പാക്കേജുകള് പ്രഖ്യാപിച്ച് കേന്ദ്ര-സംസ്ഥാന സര്ക്കാരുകള്. 10 ലക്ഷം രൂപ നഷ്ടപരിഹാരം പ്രഖ്യാപിച്ചതായി അധികൃതര് അറിയിച്ചു. കൂടാതെ, മരിച്ചയാളുടെ കുടുംബത്തിലെ ഒരാള്ക്ക് ജോലിയും നല്കും. നഷ്ടപരിഹാര തുക കേന്ദ്രവും സംസ്ഥാനവും തുല്യമായി വഹിക്കുമെന്നും ഉദ്യോഗസ്ഥര് അറിയിച്ചു.
തിങ്കളാഴ്ച കേന്ദ്ര ആഭ്യന്തര മന്ത്രി അമിത് ഷായും മണിപ്പൂര് മുഖ്യമന്ത്രി എന് ബിരേന് സിങ്ങും നടത്തിയ ചര്ച്ചയിലാണ് നഷ്ടപരിഹാര തുക സംബന്ധിച്ച തീരുമാനം പ്രഖ്യാപിച്ചത്. സംസ്ഥാനത്ത് അവശ്യ സാധനങ്ങളുടെ വില വര്ധനവ് ഒഴിവാക്കാനും പെട്രോള്, എല്പിജി ഗ്യാസ്, അരി, മറ്റ് ഭക്ഷ്യ ഉത്പന്നങ്ങള് തുടങ്ങിയ അവശ്യ സാധനങ്ങള് വന്തോതില് ലഭ്യമാക്കുമെന്ന് ഉറപ്പാക്കാനും യോഗത്തില് തീരുമാനമായി.
