പത്തനംതിട്ട : കോവിഡ് പ്രതിരോധപ്രവര്ത്തനങ്ങളുടെ ഭാഗമായി പത്തനംതിട്ട ജില്ലാ ആസ്ഥാനത്ത് നിയന്ത്രണങ്ങള് കൂടുതല് ക്രമപ്പെടുത്തി. നഗരസഭാ മാര്ക്കറ്റിന്റെ പ്രവര്ത്തനങ്ങളില് കൂടുതല് നിയന്ത്രണമുണ്ടാകും. മൂന്നു പ്രധാന കവാടങ്ങളാണ് നഗരസഭാ മാര്ക്കറ്റിനുള്ളത്. ഈ മൂന്നു കവാടങ്ങളിലും സന്നദ്ധ പ്രവര്ത്തകരെ നിയമിക്കാന് തീരുമാനമായി.
പൊതുജനങ്ങള് മാര്ക്കറ്റിലേക്ക് പ്രവേശിക്കുമ്പോഴും പുറത്തേക്ക് പോകുമ്പോഴും വാളന്റീയര്മാര് സാനിട്ടൈസര് നല്കും. മാസ്ക് മാര്ക്കറ്റിലെ വ്യാപാരികള് ശരിയായ രീതിയില് ധരിക്കുന്നുവെന്ന് വാളന്റീയര്മാര് ഉറപ്പുവരുത്തും. സാമൂഹിക അകലം കൃത്യമായി പാലിക്കുന്നുവെന്നും മാര്ക്കറ്റിലേക്ക് പ്രവശിക്കുന്ന എല്ലാവരും മാസ്ക് കൃത്യമായി ധരിക്കുന്നു എന്നും വാളന്റീയര്മാര് ഉറപ്പാക്കും. മാര്ക്കറ്റിലെ ക്രമീകരണങ്ങള് നഗരസഭാ ചെയര്മാന് അഡ്വ.ടി. സക്കീര് ഹുസൈന്, പത്തനംതിട്ട ഡി.വൈ.എസ്.പി പ്രദീപ്, നഗരസഭാ ഹെല്ത്ത് ഇന്സ്പെക്ടര് ബിനു ജോര്ജ്ജ്, നോഡല് ഓഫീസറായ കെ.ആര്.മനോജ് കുമാര് എന്നിവര് വിലയിരുത്തി.
