കൊച്ചി : ഓസ്ട്രേലിയയിലെ മെല്ബണ് എയര്പോര്ട്ടില് നിന്നും ശ്രീലങ്കന് എയര്ലൈന്സിന്റെ UL 165 നമ്പര് വിമാനത്തില് കൊളമ്പോ വഴിയാണ് പോപ്പുലര് ഫിനാന്സ് ചെയര്പെഴ്സന് ആയ മേരിക്കുട്ടി ദാനിയേല് ഇന്ന് കൊച്ചിയില് എത്തിയത്. ഈ വിമാനത്തില് 146 പേരാണ് യാത്ര ചെയ്തത്. വിമാനത്തില് ബിസിസസ് ക്ലാസ്സിന്റെ പിന്നില് രണ്ടാമത്തെ നിരയില് ഇരുന്ന ഇവര് പൊതുവേ ആശങ്കയിലായിരുന്നു. സാരിയും ബ്ലൌസുമായിരുന്നു വേഷം. സര്ജിക്കല് മാസ്ക് ധരിച്ചിരുന്നു.
വിമാനം 40 മിനിറ്റ് വൈകി രാവിലെ 10:10 നാണ് നെടുമ്പാശ്ശേരിയില് ലാന്റ് ചെയ്തത്. പത്തരയോടുകൂടി യാത്രക്കാര് പുറത്തിറങ്ങിത്തുടങ്ങി. ഏറ്റവും ഒടുവിലാണ് മേരിക്കുട്ടി ദാനിയേല് വീല്ചെയറിന്റെ സഹായത്തോടെ ഇറങ്ങിയത്. അമ്മച്ചിയെ കാത്തുനിന്നവര് അവരെ സുരക്ഷിതമായി താവളത്തിലെത്തിച്ചു. തട്ടിപ്പിന് ഇരയായ നിക്ഷേപകരുടെ പ്രതിഷേധങ്ങള് ഉണ്ടാകുമെന്ന് കരുതിയെങ്കിലും ഒരു നിക്ഷേപകന് പോലും എയര്പോര്ട്ടിലോ പരിസരപ്രദേശത്തോ ഉണ്ടായിരുന്നില്ല. ഇത് പോപ്പുലര് പ്രതികള്ക്കും ബന്ധുക്കള്ക്കും ഏറെ ആശ്വാസമായി.
അഭിഭാഷകര് ഉള്പ്പെടെയുള്ളവരാണ് അമ്മച്ചിയെ വിമാനത്താവളത്തില് സ്വീകരിച്ചത്. നാളെ ഇവര് സി.ബി.ഐ ഓഫീസില് ഹാജരാകുമെന്നാണ് സൂചന. പോപ്പുലര് കേസ് അന്വേഷിക്കുന്ന മറ്റ് ഏജന്സികളും മേരിക്കുട്ടി ദാനിയേലിനെ ചോദ്യം ചെയ്യുമെന്നാണ് അറിയുന്നത്. നിക്ഷേപ തട്ടിപ്പില് പങ്കുണ്ടെന്ന് തോന്നിയാല് ഒരുപക്ഷെ അറസ്റ്റ് ചെയ്യുവാനും സാധ്യതയുണ്ട്. കാര്യങ്ങള് കൈവിട്ടു പോകാതിരിക്കുവാന് സുപ്രീംകോടതിയിലെ മുതിര്ന്ന അഭിഭാഷകരെ രംഗത്തിറക്കുവാനും നീക്കം നടക്കുന്നുണ്ട്.
