പുതുശ്ശേരിമല/റാന്നി : രാത്രിയിൽ വീടിന് പുറത്തിറങ്ങിയ ശാരീരിക വെല്ലുവിളികൾ നേരിടുന്ന സഹോദരിയെ ആക്രമിച്ച് മുഖംമൂടി ധാരി മൊബൈൽ ഫോൺ കവർന്നു. പുതുശ്ശേരിമല സ്വദേശികളായ രാധ (50), ജ്യേഷ്ഠത്തി ശോഭന (58) എന്നിവർക്ക് നേരെയാണ് ആക്രമണം ഉണ്ടായത്. കഴിഞ്ഞ ദിവസം രാത്രി 8:30 ഓടെയാണ് സംഭവം നടന്നത്. ശാരീരിക വെല്ലുവിളി നേരിടുന്ന രാധ മുറ്റത്തിറങ്ങിയപ്പോൾ കാവി മുണ്ട് ഉടുത്ത് മുഖംമൂടി ധരിച്ച ഒരാൾ ഇവരെ പിടികൂടുകയായിരുന്നു.
രാധയുടെ നിലവിളി കേട്ട് ജ്യേഷ്ഠത്തി ശോഭന ഓടിയെത്തി സഹോദരിയെ രക്ഷിക്കാൻ ശ്രമിക്കുന്നതിനിടെ അക്രമി ഇവരെ പിടിച്ചുതള്ളുകയും കയ്യിലുണ്ടായിരുന്ന മൊബൈൽ ഫോൺ തട്ടിയെടുത്ത് ഇരുട്ടിൽ മറയുകയുമായിരുന്നു. പ്രതിക്കായി റാന്നി പോലീസ് തിരച്ചിൽ ആരംഭിച്ചിട്ടുണ്ട്. പ്രദേശത്ത് മുൻപും സമാനമായ രീതിയിൽ മോഷണശ്രമങ്ങൾ നടന്നിട്ടുള്ളതിനാൽ നാട്ടുകാർ കടുത്ത ഭീതിയിലാണ്.
