മല്ലപ്പളി : വാഹനങ്ങള് കടന്നു പോകുമ്പോള് ടാറിംഗ് ഇളകിമാറുന്ന തരത്തില് ആധുനിക രീതിയില് റോഡ് നിര്മ്മിച്ച് മാതൃകയായി മാറിയിരിക്കുകയാണ് പൊതുമരാമത്ത് വകുപ്പ്. മല്ലപ്പള്ളി -എഴുമറ്റൂര് റോഡില് പാടിമണ്ണിന് സമീപമുള്ള കൊടും വളവിലാണ് പൊതു മരാമത്ത് അധികൃതരുടെ ഈ അത്ഭുത പ്രതിഭാസം. മുന്പ് ഉണ്ടായിരുന്ന ടാറിങ്ങിന് മുകളില് പേരിനുമാത്രം ടാറിംഗ് നടത്തി ലക്ഷങ്ങള് എഴുതിയെടുത്തതാണ് സംഭവത്തിന് പിന്നിലെന്ന് നാട്ടുകാര് ആരോപിക്കുന്നു. പാടിമണ്ണിന് സമീപമുള്ള കൊടും വളവിലാണ് ടാറിംഗ് ഇളകി മാറിയത്. റോഡിന്റെ പല ഭാഗങ്ങളിലും ഇത്തരത്തില് ടാറിംഗ് ഇളകി മാറി വലിയ കുഴികള് രൂപപെട്ടിട്ടുണ്ട്.
കൃത്യമായ രീതിയില് മെറ്റലിംഗ് നടത്താതെ ടാറിംഗ് നടത്തിയതാണ് റോഡ് തകരാന് കാരണം. ഇരുചക്ര വാഹന യാത്രക്കാരാണ് കൂടുതല് ബുദ്ധിമുട്ട് നേരിടുന്നത്. എഴുമറ്റൂരിലെ പാറമടകളില് നിന്നും അമിത ഭാരം കയറ്റി പോകുന്ന ടോറസ് ലോറികളും റോഡ് തകര്ച്ചയ്ക്ക് കാരണമായി തീരുന്നുണ്ട്. മല്ലപ്പള്ളിയില് പൊതുമരാമത്ത് വകുപ്പ് അധികൃതരുടെ മൂക്കിന് താഴെ നടക്കുന്ന ഈ അഴിമതി ജനപ്രതിനിധികള് പോലും കണ്ടില്ലെന്ന് നടിക്കുകയാണ്.
