തൃശൂർ : ജില്ലയിലെ കൊരട്ടി മാമ്പ്രയിൽ പ്രവർത്തിക്കുന്ന കിടക്ക നിർമ്മാണശാലയിൽ ഇന്ന് രാവിലെ വൻ തീപിടുത്തം ഉണ്ടായി. മാമ്പ്ര സ്വദേശിയായ അമീർ എന്നയാളുടെ ഉടമസ്ഥതയിലുള്ള സ്ഥാപനമാണ് കത്തിനശിച്ചത്. ഇന്ന് രാവിലെ ഏഴു മണിയോടെയാണ് തീപിടുത്തം ഉണ്ടായതായി നാട്ടുകാരുടെയും തൊഴിലാളികളുടെയും ശ്രദ്ധയിൽപ്പെടുന്നത്. വർഷങ്ങളായി നിരവധി തൊഴിലാളികൾ ജോലി ചെയ്തുവരുന്ന ഈ നിർമ്മാണശാലയുടെ ഒരു ഭാഗം തീപിടുത്തത്തിൽ പൂർണ്ണമായും കത്തിനശിച്ചു. പ്രാഥമികമായ വിലയിരുത്തൽ പ്രകാരം ഷോർട്ട് സർക്യൂട്ടാണ് തീപിടുത്തത്തിന് കാരണം എന്നാണ് നിഗമനം.
തീപിടുത്തം ശ്രദ്ധയിൽപ്പെട്ട ഉടൻ തന്നെ ചാലക്കുടി, ഇരിങ്ങാലക്കുട എന്നിവിടങ്ങളിൽ നിന്നുള്ള ഫയർഫോഴ്സ് യൂണിറ്റുകൾ സ്ഥലത്തെത്തി തീ അണയ്ക്കാനുള്ള ശ്രമങ്ങൾ ആരംഭിച്ചു. നിലവിൽ തീ നിയന്ത്രണവിധേയമാക്കാനുള്ള ശ്രമങ്ങൾ തുടരുകയാണ്. സംഭവത്തിൽ വൻ സാമ്പത്തിക നഷ്ടം ഉണ്ടായതായാണ് സൂചന.
