കൊല്ലം: കാമുകനെ സന്തോഷിപ്പിക്കാന്‍ രണ്ടാംക്ലാസ്സുകാരിയായ മകളെ ക്രൂരമായി ഉപദ്രവിച്ച് വീഡിയോ കാമുകന് അയച്ച യുവതി അറസ്റ്റില്‍. കൊല്ലം കുണ്ടറയിലാണ് ഈ ക്രൂരത അരങ്ങേറിയത്. രണ്ടാംക്ലാസ്‌ വിദ്യാര്‍ഥിയായ മകളെ രാത്രികാലങ്ങളിൽ ഉറങ്ങാൻ പോലും അനുവദിക്കാതെ ഉപദ്രവിക്കുന്ന ദൃശ്യങ്ങള്‍ വീഡിയോ കോളിലൂടെ കാമുകനു കൈമാറുകയായിരുന്നു യുവതിയുടെ രീതി. കുരീപ്പള്ളി മോതീന്‍മുക്ക് സ്വദേശിയാണ് അറസ്റ്റിലായത്. ഭര്‍തൃമതിയായ യുവതി കരുനാഗപ്പള്ളി തേവലക്കര സ്വദേശിയുമായി ഏറെനാളായി അടുപ്പത്തിലാണ്.
ഇയാളുടെ നിര്‍ദേശപ്രകാരം രാത്രിയില്‍ കുട്ടിയെ മണ്ണില്‍ ഉരുട്ടുന്നതും മറ്റുംവീഡിയോ കോള്‍ വഴി കാമുകനെ കാണിക്കുകയായിരുന്നു. കുട്ടിയെ ദീര്‍ഘനാളായി ഇത്തരത്തില്‍ പീഡിപ്പിക്കുന്നുണ്ട്‌. ഡിസംബര്‍ 13ന്‌ കുട്ടി ക്ലാസിലിരുന്നു ഉറങ്ങുന്നത് ശ്രദ്ധയില്‍പ്പെട്ട അധ്യാപിക തിരക്കിയപ്പോഴാണ് പീഡനം അറിഞ്ഞത്‌. തുടർന്ന് സ്കൂള്‍ അധികൃതര്‍ ശിശുക്ഷേമ സമിതിയില്‍ വിവരം അറിയിക്കുകയായിരുന്നു.
