കൊച്ചി: മാത്യു കുഴല്നാടന് എംഎല്എക്കെതിരെ നികുതി വെട്ടിപ്പ് ആരോപണവുമായി സിപിഎം. മാത്യു കുഴല്നാടന് ചിന്നക്കനാലില് വാങ്ങിയ സ്ഥലത്തെ കുറിച്ച് നല്കിയ കണക്കുകളില് ക്രമക്കേട് ഉണ്ടെന്ന് സിപിഎം എറണാകുളം ജില്ലാ സെക്രട്ടറി സി എന് മോഹന് പറഞ്ഞു. ആറുകോടിയോളം രൂപ വിലമതിക്കുന്ന ഭൂമിയും ആഡംബര റിസോര്ട്ടും നികുതി വെട്ടിപ്പിലൂടെ സ്വന്തമാക്കിയെന്നാണ് ആരോപണം. 3.50 കോടി വിലയുണ്ടെന്ന് മാത്യു കുഴല്നാടന്തന്നെ സാക്ഷ്യപ്പെടുത്തുന്ന വസ്തുവകകളാണ് 1,92,60,000 രൂപയ്ക്ക് കുഴല്നാടന്റെയും കൂട്ടു കക്ഷികളുടെയും പേരില് രജിസ്റ്റര് ചെയ്തതെന്നും സിഎന് മോഹനന് പറഞ്ഞു.
സ്ഥലപരിശോധനപോലും നടത്താതെ ഇടുക്കി രാജകുമാരി സബ് രജിസ്ട്രാര് ഈ തുകയ്ക്കുമാത്രമായി 15,40,800 രൂപ മുദ്രവില ചുമത്തി രജിസ്ട്രേഷന് നടത്തിക്കൊടുത്തുവെന്നും സിഎന് മോഹനന് പറഞ്ഞു. 2021 മാര്ച്ച് 18നാണ് 561/21 നമ്പര് പ്രകാരം ആധാരം രജിസ്റ്റര് ചെയ്തത്. ഈ വസ്തുവിനും 4000 ചതുരശ്രയടി കെട്ടിടത്തിനും മൂന്നരക്കോടി രൂപ വിലയുണ്ടെന്ന് തൊട്ടടുത്ത ദിവസം തെരഞ്ഞെടുപ്പ് കമീഷനു നല്കിയ സത്യവാങ്മൂലത്തില് കുഴല്നാടന് വ്യക്തമാക്കുന്നുണ്ടെന്നും മോഹനന് ചൂണ്ടിക്കാട്ടി. യഥാര്ഥ വിപണി വില മറച്ചുവച്ച്, ഭൂമിയുടെ ന്യായവില കാട്ടി ആധാരം രജിസ്റ്റര് ചെയ്യുകയായിരുന്നു എന്നും ആരോപണമുണ്ട്.
