തൃശൂര്: ഹോട്ടലില് ബിയര് കഴിക്കാന് സമ്മതിക്കാത്തതിനെ തുടര്ന്ന് മെഡിക്കല് കോളജ് വിദ്യാര്ഥികളുടെ ആക്രമണം. തൃശൂരിലെ അല്മിയ റെസ്റ്റോറന്റിലാണ് സംഭവം.കോളജ് വിദ്യാര്ഥികളുടെ ബ്ലേഡ് കൊണ്ടുള്ള ആക്രമണത്തില് ഹോട്ടല് മാനേജര് അനീഷിന് പരിക്കേറ്റു. ഭക്ഷണത്തിനൊപ്പം ബിയര് കുടിക്കാന് സമ്മതിക്കാത്തതിനെ തുടര്ന്നാണ് മാനേജറെ ആക്രമിച്ചത്. തൃശൂര് ഗവണ്മെന്റ് മെഡിക്കല് കോളജിലെ വിദ്യാര്ഥികളായ രണ്ട് ആണ്കുട്ടികളും ഒരു പെണ്കുട്ടിയുമാണ് ബിയറുമായി ഹോട്ടലില് എത്തിയത്.
തുടര്ന്ന് മേശപ്പുറത്ത് ബിയര് കുപ്പികള് തുറന്നുവെച്ച് കുടിക്കാന് ശ്രമിച്ചപ്പോള് മാനേജര് തടയുകയായിരുന്നു.വിഷയം സംസാരിച്ച് ഒത്തുതീര്പ്പാക്കി മടങ്ങിയ വിദ്യാര്ഥികള് ഒരു മണിക്കൂറിന് ശേഷം എട്ടോളം പേരുമായെത്തി മൂര്ച്ചയുള്ള ബ്ലേഡ് ഉപയോഗിച്ച് മാനേജറെ പരിക്കേല്പ്പിക്കുകയായിരുന്നു. സംഭവത്തില് മെഡിക്കല് കോളജ് പോലീസില് ജീവനക്കാര് പരാതി നല്കിയിട്ടുണ്ട്. കുറ്റക്കാര്ക്കെതിരെ കര്ശന നടപടി സ്വീകരിക്കണമെന്ന് കേരള ഹോട്ടല് ആന്ഡ് റെസ്റ്റോറന്റ് അസോസിയേഷന് ആവശ്യപ്പെട്ടു.
