തിരുവനന്തപുരം : മരുന്നുകളും സുരക്ഷ ഉപകരങ്ങളുടേയും വിപുലമായ ഉത്പാദനം കേരളത്തില് ആരംഭിക്കുന്നതിനുള്ള സാധ്യത സര്ക്കാര് പരിശോധിക്കുന്നു. കൊവിഡ് മൂന്നാം തരംഗം മുന്നില് കണ്ടാണ് സര്ക്കാരിന്റെ ഈ നീക്കം. സംസ്ഥാനത്തിനാവശ്യമായ മരുന്നുകളും സുരക്ഷാ ഉപകരണങ്ങളും തദ്ദേശിയമായി തന്നെ നിര്മ്മിക്കാന് കഴിയുന്നതിന്റെ സാധ്യത ആരോഗ്യ, വ്യവസായ വകുപ്പുകള് തമ്മില് ഇന്ന് ചര്ര്ച്ച ചെയ്തു.
ഇതിനായി ആരോഗ്യ, വ്യവസായ വകുപ്പ് പ്രിന്സിപ്പല് സെക്രട്ടറിമാരും കെ.എം.എസ്.സി.എല്, കെ.എസ്.ഡി.പി.എല് മാനേജിംഗ് ഡയറക്ടര്മാരും ചേര്ന്ന കമ്മിറ്റിയുണ്ടാക്കാന് തീരുമാനിച്ചിട്ടുണ്ട്. വ്യവസായ വകുപ്പ് മന്ത്രി പി.രാജീവ്, ആരോഗ്യ വകുപ്പ് മന്ത്രി വീണാ ജോര്ജ് എന്നിവരുടെ നേതൃത്വത്തില് നടന്ന യോഗത്തിലാണ് ഇതുസംബന്ധിച്ച തീരുമാനമെടുത്തത്. കോവിഡ് മൂന്നാം തരംഗത്തില് ഗ്ലൗസ്, മാസ്ക്, പി.പി.ഇ കിറ്റ്, തുടങ്ങിയ സുരക്ഷാ സാമഗ്രികളുടേയും മെഡിക്കല് ഉപകരണങ്ങളുടേയും ലഭ്യത ഉറപ്പാക്കുന്നതിനാണ് ഇരു വകുപ്പുകളുടേയും സംയുക്ത യോഗം വിളിച്ചത്.
