റാന്നി: കഴിഞ്ഞ 9 വർഷത്തിനിടയിൽ പശ്ചാത്തല മേഖലയിൽ വലിയ കുതിച്ചുചാട്ടം ആണ് സംസ്ഥാനത്ത് ഉണ്ടായതെന്ന് പൊതുമരാമത്ത് വകുപ്പ് മന്ത്രി പി എ മുഹമ്മദ് റിയാസ് പറഞ്ഞു. ഉന്നത നിലവാരത്തിൽ പുനരുദ്ധരിച്ച പ്ലാപ്പള്ളി – തുലാപ്പള്ളി, മൂക്കൻ പെട്ടി – പമ്പാവാലി റോഡുകൾ ഓൺലൈനായി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഇതിൻ്റെ ഭാഗമായി ഉന്നത നിലവാരത്തിലുള്ള നിരവധി റോഡുകളും പാലങ്ങളും നിർമ്മിക്കാൻ കഴിഞ്ഞതായി അദ്ദേഹം പറഞ്ഞു. ശബരിമല തീർത്ഥാടകർക്ക് കൂടി പ്രയോജനപ്പെടുന്ന റോഡ് 6.5 കോടി രൂപ ചിലവഴിച്ചാണ് ബിഎംബിസി നിലവാരത്തിൽ പുനരുദ്ധരിച്ചത്.
ലോക ഭൂപടത്തിൽ ഇടം പിടിച്ച ടൂറിസ്റ്റ് കേന്ദ്രമായ ഗവിയിലേക്കുള്ള റോഡ് എന്ന പ്രത്യേകതയും ഇതിനുണ്ട്. അഡ്വ. പ്രമോദ് നാരായൺ എംഎൽഎ അധ്യക്ഷത വഹിച്ചു. അഡ്വ സെബാസ്റ്റ്യൻ കുളത്തിങ്കൽ എംഎൽഎ, ബ്ലോക്ക് പഞ്ചായത്ത് പ്രസിഡൻറ് കെ എസ് ഗോപി, പെരുനാട് പഞ്ചായത്ത് പ്രസിഡൻ്റ് പി എസ് മോഹൻ, പൊതുമരാമത്ത് വകുപ്പ് നിരത്ത് വിഭാഗം എൻജിനീയർ ബാബുരാജ്, അസി എക്സ് എൻജിനീയർ റോമി ജെ ചിങ്ങംപറമ്പിൽ, റിൻസി ബൈജു, പി ആർ സാബു , എ എച്ച് കബീർ, എ എസ് വർഗീസ്, രാജീവ് വർഗീസ് എന്നിവർ പ്രസംഗിച്ചു.
