താനൂര്: മലപ്പുറം താനൂരിലെ ബോട്ടപകടത്തില് പെട്ട് ചികിത്സയില് ഉള്ള കുട്ടികള്ക്കും മുതിര്ന്നവര്ക്കും കൗണ്സിലിംഗ് നല്കുമെന്ന് ആരോഗ്യമന്ത്രി വീണാ ജോര്ജ്ജ്. ചികിത്സയിലുള്ളവരെ സന്ദര്ശിച്ചതിനു ശേഷം മാധ്യമങ്ങളോട് പ്രതികരിക്കുകയായിരുന്നു മന്ത്രി. രണ്ടു പേരാണ് നിലവില് വെന്റിലേറ്ററില് ഉള്ളത്. രണ്ടുപേരും സ്വകാര്യ ആശുപത്രിയിലാണ് ചികിത്സയിലുള്ളത്.അതേസമയം, ചികിത്സയിലുള്ള എല്ലാവരും അപകട നില തരണം ചെയ്തു. രക്ഷാപ്രവര്ത്തകര്ക്ക് എലിപ്പനി പ്രതിരോധ ഗുളിക നല്കുമെന്നും മന്ത്രി അറിയിച്ചു.
അതേസമയം ബോട്ടപകടവുമായി ബന്ധപ്പെട്ട് മുഴുവന് പേരെയും കണ്ടെത്തിയതായി ദുരന്ത നിവാരണ വിഭാഗം അറിയിച്ചു. 37 പേരാണ് അപകടത്തില്പ്പെട്ടത്. ഇതില് 22 പേര് മരണപ്പെട്ടു. 10 പേരെയാണ് രക്ഷപ്പെടുത്താനായത്. 5 പേര് നീന്തിക്കയറുകയായിരുന്നു. അപകടത്തില്പ്പെട്ട ഒരു കുട്ടിയെ കാണാനില്ലെന്നത് അഭ്യൂഹം മാത്രമാണ്. കുട്ടി കോഴിക്കോട് മെഡിക്കല് കോളജില് ചികിത്സയിലുണ്ട്. വൈകിട്ടോടെ തെരച്ചില് അവസാനിപ്പിക്കുമെന്ന് ദുരന്ത നിവാരണ വിഭാഗം അറിയിച്ചു.