കേരളത്തിലടക്കം പ്രവർത്തിക്കുന്ന തമിഴ്നാട്ടിലെ അന്നൂരിൽ പ്രവർത്തിക്കുന്ന വിശ്വദീപ്തി മൾട്ടി-സ്റ്റേറ്റ് അഗ്രി കോ ഓപ്പറേറ്റീവ് സൊസൈറ്റി ലിമിറ്റഡിന്റെ പ്രവർത്തനത്തെക്കുറിച്ച് പരിശോധന നടത്താൻ സഹകരണ മന്ത്രാലയം ഉത്തരവിട്ടു. കാലാവധി പൂർത്തിയായ നിക്ഷേപങ്ങൾ മടക്കി നൽകുന്നില്ലെന്ന് ആരോപിച്ച് നിക്ഷേപകരിൽ നിന്ന് നിരവധി പരാതികൾ ലഭിച്ചതിനെ തുടർന്നാണ് ഉത്തരവ്. 2002-ലെ മൾട്ടി-സ്റ്റേറ്റ് കോ-ഓപ്പറേറ്റീവ് സൊസൈറ്റീസ് ആക്ട് പ്രകാരം രജിസ്റ്റർ ചെയ്ത ഈ സൊസൈറ്റിയിൽ അംഗങ്ങളായ ഫിലോമിന വർഗീസ്, ലില്ലി ചുമ്മർ, ചെല്ലക്കുടം സാനിക്കുട്ടി ചുമ്മർ എന്നിവർ 2025 മാർച്ച് 27-ന് നിക്ഷേപ തുക ലഭിച്ചില്ലെന്ന് ചൂണ്ടിക്കാട്ടി ഔദ്യോഗികമായി പരാതി നൽകിയതിനെത്തുടർന്ന് ഏഴ് ദിവസത്തിനുള്ളിൽ നടപടി സ്വീകരിച്ച് റിപ്പോർട്ട് നൽകാൻ സെൻട്രൽ രജിസ്ട്രാർ ഓഫീസിൽ നിന്ന് നിർദ്ദേശം നൽകിയിട്ടും സൊസൈറ്റി അത് പാലിച്ചില്ല. കൂടാതെ ഈ വിഷയം സഹകരണ ഓംബുഡ്സ്മാന്റെ ഓഫീസിലേക്ക് റഫർ ചെയ്തിരുന്നു.
2025 ഏപ്രിൽ 4 ലെ ആനുകാലിക സ്റ്റാറ്റസ് റിപ്പോർട്ടിൽ സൊസൈറ്റി കാലാവധി പൂർത്തിയായ നിക്ഷേപങ്ങൾ തിരികെ നൽകാത്തതുമായി ബന്ധപ്പെട്ട് നിരവധി പരാതികൾ ലഭിച്ചിട്ടുണ്ടെന്ന് സ്ഥിരീകരിച്ചു. വർദ്ധിച്ചുവരുന്ന പരാതികളുടെയും സൊസൈറ്റിയിൽ നിന്നുള്ള പ്രതികരണത്തിന്റെയും അഭാവവും കണക്കിലെടുത്ത് സെൻട്രൽ രജിസ്ട്രാർ ഓഫ് കോ ഓപ്പറേറ്റീവ് സൊസൈറ്റീസ്, രബീന്ദ്ര കുമാർ അഗർവാൾ 2002 ലെ എംഎസ്സിഎസ് ആക്ടിന്റെ സെക്ഷൻ 108 പ്രകാരം നടപടി സ്വീകരിച്ചു. നാഷണൽ കോ ഓപ്പറേറ്റീവ് ഡെവലപ്മെന്റ് കോർപ്പറേഷന്റെ ചെന്നൈ റീജിയണൽ ഓഫീസ് ഡെപ്യൂട്ടി ഡയറക്ടർ സച്ചിൻ ശർമ്മയെ 30 ദിവസത്തിനുള്ളിൽ സൊസൈറ്റിയുടെ പ്രവർത്തനങ്ങളുടെ സമഗ്രമായ പരിശോധന നടത്തി വിശദമായ റിപ്പോർട്ട് സമർപ്പിക്കാൻ അദ്ദേഹം അധികാരപ്പെടുത്തി.
സാമ്പത്തിക ദുരുപയോഗത്തിന് കൂടുതൽ പരിശോധന നേരിടുന്ന മൾട്ടി-സ്റ്റേറ്റ് സഹകരണ സംഘങ്ങളിൽ ഉത്തരവാദിത്തം ഉറപ്പാക്കുന്നതിനുള്ള ഒരു സുപ്രധാന ചുവടുവെയ്പ്പായിട്ടാണ് ഈ നീക്കത്തെ കാണുന്നത്. സൊസൈറ്റിക്കെതിരായ ഭാവി നടപടികളെക്കുറിച്ച് പരിശോധനാ റിപ്പോർട്ട് ലഭിച്ച ശേഷമാകും തീരുമാനമെടുക്കുക. അതിൽ 2002 ലെ MSCS ആക്ടും അതിന് കീഴിൽ രൂപപ്പെടുത്തിയ നിയമങ്ങളും പ്രകാരമുള്ള നിയന്ത്രണം അല്ലെങ്കിൽ ശിക്ഷാ നടപടികൾ ഉൾപ്പെട്ടേക്കാം.
