തൃശൂര് : ട്രെയിന് യാത്രയ്ക്കിടെ അച്ഛനും മകളും സഹയാത്രികരുടെ ആക്രമണത്തിന് ഇരയായ സംഭവത്തില് പ്രതികളെപ്പറ്റിയുള്ള നിര്ണായക വിവരങ്ങള് ലഭിച്ചതായി സൂചന. ഇരിങ്ങാലക്കുട, ചാലക്കുടി ഭാഗത്തു നിന്ന് എറണാകുളം ഭാഗത്തേക്കുള്ള സ്ഥിരം യാത്രക്കാരാണ് അക്രമികള് എന്ന വിവരമാണു പോലീസിനു ലഭിച്ചിട്ടുള്ളത്. ഗവ.റെയില്വേ പോലീസിന്റെ (ജിആര്പി) എറണാകുളം യൂണിറ്റാണ് അന്വേഷണം നടത്തുന്നത്. റെയില്വേ പ്രൊട്ടക്ഷന് ഫോഴ്സിന്റെ (ആര്പിഎഫ്) എറണാകുളം, തൃശൂര് യൂണിറ്റുകളും അന്വേഷണവുമായി സഹകരിക്കുന്നുണ്ട്. ആക്രമണത്തിനിരയായത് 16 വയസ്സുള്ള പെണ്കുട്ടിയാണ്.
പ്രതികളിലൊരാളുടെ ഫോട്ടോ അച്ഛനും മകളും തിരിച്ചറിഞ്ഞിട്ടുണ്ട്. എന്നാല് അന്വേഷണത്തിന്റെ പുരോഗതിയെക്കുറിച്ച് ഒരു വിവരവും പോലീസില് നിന്നു ലഭിച്ചില്ലെന്നു പെണ്കുട്ടിയുടെ അച്ഛന് പ്രതികരിച്ചു. ദലിതനായ തന്റെ അവസ്ഥ ഇതാണെങ്കില് മറ്റുള്ളവരുടെ സ്ഥിതി എന്തായിരിക്കുമെന്നും അദ്ദേഹം ചോദിച്ചു. സംഭവത്തില് പ്രതിഷേധിച്ച് ഇന്നു രാവിലെ 10നു തൃശൂര് റെയില്വേ സ്റ്റേഷനില് കോണ്ഗ്രസ് ധര്ണ നടത്തും.
