ചെന്നൈ : പ്രായപൂര്ത്തിയാകാത്ത പെണ്കുട്ടിയെ തട്ടിക്കൊണ്ടുപോയി പീഡിപ്പിച്ച കേസില് മലയാളി യുവാവ് തമിഴ്നാട്ടില് അറസ്റ്റില്. പാലക്കാട് വടക്കാഞ്ചേരി സ്വദേശി അജയ് (25) ആണ് പോലീസിന്റെ പിടിയിലായത്. പെരുന്തുറയ്ക്കടുത്ത് കാമ്പുളിയംപെട്ടി ഗ്രാമത്തിലെ പതിനേഴുകാരിയാണ് പീഡനത്തിനിരയായത്. പെണ്കുട്ടിയുടെ ഗ്രാമത്തിലെ ക്ഷേത്രോത്സവത്തിന് ബാന്ഡ് മേളത്തിന് എത്തിയ അജയ് പെണ്കുട്ടിയെ പരിചയപ്പെട്ടു. പെണ്കുട്ടിയുടെ മൊബൈല് നമ്പര് വാങ്ങി. ഫോണില് സംസാരിക്കുന്നത് പതിവായി.
കഴിഞ്ഞ ദിവസം മുതല് പെണ്കുട്ടിയെ കാണാതായിരുന്നു. പരാതിയില് പെരുന്തുറ പോലീസ് കേസെടുത്ത് അന്വേഷണം ആരംഭിച്ചു. അന്വേഷണത്തില് പെണ്കുട്ടിയെ വിവാഹം കഴിക്കാമെന്ന് വിശ്വസിപ്പിച്ച് അജയ് കൂട്ടിക്കൊണ്ടുപോയതായി വ്യക്തമായി. പോലീസ് നടത്തിയ തിരച്ചിലില് വിജയമംഗലം ബസ് സ്റ്റാന്ഡിന് സമീപം പെണ്കുട്ടിയും അജയും നില്ക്കുന്നതായി പോലീസിന് വിവരം ലഭിച്ചത്. തുടര്ന്ന് പോലീസ് അവിടെയെത്തി അജയിയെ അറസ്റ്റ് ചെയ്തു.