മലപ്പുറം : പ്രായപൂര്ത്തിയാകാത്ത പെണ്കുട്ടിയെ ബസ് യാത്രക്കിടെ അപമാനിച്ചെന്ന കേസില് പ്രതിക്ക് നാല് വര്ഷം കഠിന തടവും അന്പതിനായിരം രൂപ പിഴയും. മലപ്പുറം എടപ്പാള് സ്വദേശി ജബ്ബാറിനെയാണ് പട്ടാമ്പി അതിവേഗ കോടതി ശിക്ഷിച്ചത്. 2019 ഡിസംബര് ആറിനായിരുന്നു കേസിനാസ്പദമായ സംഭവം നടന്നത്. പാലക്കാട് ഗുരുവായൂര് പാതയില് ഓടുന്ന ബസില് കണ്ടക്ടറായിരുന്ന എടപ്പാള് സ്വദേശി ജബ്ബാര് പ്രായപൂര്ത്തിയാകാത്ത പെണ്കുട്ടിയെ അപമാനിക്കുകയും മാനഹാനി ഉണ്ടാക്കുകയും ചെയ്തു എന്നതാണ് കേസ്. പെണ്കുട്ടിയുടെ കുടുംബം നല്കിയ പരാതിയുടെ അടിസ്ഥാനത്തില് പട്ടാമ്പി പോലീസ് പെണ്കുട്ടിയുടെ മൊഴി രേഖപ്പെടുത്തി കേസെടുക്കുകയായിരുന്നു.
പ്രതിക്ക് നാല് വര്ഷം കഠിന തടവും അന്പതിനായിരം രൂപയുമാണ് ശിക്ഷ വിധിച്ചത്. പിഴത്തുക പെണ്കുട്ടിക്ക് നല്കണം. പട്ടാമ്പി അതിവേഗ കോടതി ജഡ്ജി സതീഷ് കുമാറിന്റേതാണ് വിധി. പട്ടാമ്പി എസ്.ഐ ആയിരുന്ന അബ്ദുള് ഹക്കീമാണ് കേസ് രജിസ്റ്റര് ചെയ്ത് അന്വേഷണം നടത്തിയത്. പ്രോസിക്യൂഷന് ഭാഗത്തു നിന്നും പതിനൊന്ന് സാക്ഷികളെ വിസ്തരിച്ചു. പതിനാറ് രേഖകള് കോടതിയില് ഹാജരാക്കി. പ്രോസീക്യൂഷന് വേണ്ടി നിഷ വിജയകുമാര് ഹാജരായി.