കോഴിക്കോട്‌ : തിരുവമ്പാടി ഇരുവഴിഞ്ഞിപുഴയിലെ പുല്ലൂരാംപാറ പത്തായപ്പാറയില്‍ യുവാവിനെ ഒഴുക്കില്‍പെട്ട് കാണാതായി. സമീപവാസിയായ ചാരനാല്‍ ഷിനോയിയുടെ മകന്‍ ജയിംസിനെയാണ് (22)കാണാതായത്. സുഹൃത്തിനൊപ്പം പുഴയോരത്ത് എത്തിയപ്പോള്‍ കാല്‍ വഴുതി ഒഴുക്കില്‍പെടുകയായിരുന്നു. വെള്ളിയാഴ്ച വൈകീട്ട് നാലരയോടെയാണ് അപകടം. സുഹൃത്ത് പുഴയിലിറങ്ങി രക്ഷപ്പെടുത്താന്‍ ശ്രമിച്ചെങ്കിലും ഒഴുക്കില്‍ പെടുകയായിരുന്നുവെന്ന് പറയുന്നു. ഈ സമയം പുഴയില്‍ ശക്തമായ ഒഴുക്കായിരുന്നുവെന്ന് നാട്ടുകാര്‍ പറഞ്ഞു. നാട്ടുകാരും മുക്കത്തു നിന്നെത്തിയ അഗ്നിശമന സേനയും രാത്രി വരെ തിരച്ചില്‍ നടത്തിയെങ്കിലും യുവാവിനെ കണ്ടെത്താനായില്ല. രാവിലെ വീണ്ടും തിരച്ചില്‍ ആരംഭിച്ചു.
