ആലപ്പുഴ : ഒരു കുടുംബത്തിലെ പതിനാറ് പേര്ക്ക് സമ്പര്ക്കത്തിലൂടെ കൊവിഡ് സ്ഥിരീകരിച്ചതോടെ കായംകുളത്ത് ആശങ്ക ഇരട്ടിയാകുന്നു. സാമൂഹ്യ വ്യാപനത്തിന്റെ വക്കിലാണ് മേഖലയെന്നാണ് ആരോഗ്യ വകുപ്പിന്റെ വിലയിരുത്തല്. സമ്പര്ക്ക രോഗികളുടെ എണ്ണം കൂടുന്നതോടെ ജില്ലയില് നിയന്ത്രണങ്ങള് കര്ശനമാക്കിയിരിക്കുകയാണ് ജില്ല ഭരണകൂടം.
കഴിഞ്ഞ ദിവസം രോഗം സ്ഥീരികരിച്ച പച്ചക്കറി വ്യാപാരിയുടെ കുടുംബത്തിലെ 16 പേര്ക്കാണ് രോഗം സ്ഥിരീകരിച്ചത്. രോഗബാധ സംശയിച്ച് ഈ കുടുംബത്തിലെ 29 പേരുടെ ശ്രവം പരിശോധനയ്ക്ക് എടുത്തിരുന്നു. ഇവരില് രോഗം സ്ഥീരികരിച്ചവരില് എട്ടും ഒമ്പതും മാസം പ്രായമായ കുഞ്ഞുങ്ങളും അമ്പത്തിനാല് വയസുകാരനും ഉള്പ്പെടുന്നു.
ഇതിനു പുറമെ റോഡ് വിഭാഗം ഓഫിസിലെ ജീവനക്കാരിയും രോഗം സ്ഥിരീകരിച്ചവരുടെ കൂട്ടത്തിലുണ്ട്. അതേ സമയം ആദ്യം കൊവിഡ് സ്ഥീരികരിച്ച പച്ചക്കറി വ്യാപാരിയുടെ ഉറവിടം ഇപ്പോഴും വ്യക്തമായിട്ടില്ല. ആറാട്ടുപുഴ സ്വദേശിനിയായ ഗര്ഭിണിക്കും സമ്പര്ക്കത്തിലൂടെ രോഗം ബാധിച്ചു. 21 പേര്ക്കുകൂടി രോഗം ബാധിച്ചതോടെ ജില്ലയില് ചികിത്സയിലുള്ളവരുടെ എണ്ണം 202 ആയി. കായംകുളത്ത് സാമൂഹ്യ വ്യാപനമുണ്ടായോയെന്ന് പരിശോധിക്കാന് നഗരസഭാ പരിധിയില് പരിശോധന എണ്ണം കൂട്ടാന് ആരോഗ്യ വകുപ്പ് തീരുമാനിച്ചു.
