റിയാദ് : കരുനാഗപ്പള്ളി സ്വദേശിയെ റിയാദില് കാണാനില്ലെന്ന് പരാതി. കല്ലേലിഭാഗം പുതുവീട്ടില് താജുദ്ദീന് അഹമ്മദ് കുഞ്ഞിനെയാണ് ഒരാഴ്ചയിലേറെയായി കാണാനില്ലെന്ന് വീട്ടുകാര് പരാതിപ്പെടുന്നത്. റിയാദിലെ അസീസിയ പച്ചക്കറി മാര്ക്കറ്റിനടുത്ത് ബന്ധുക്കളോടൊപ്പം താമസിച്ചുവരികയായിരുന്നു. വൈറസ് ബാധയേറ്റെന്ന സംശയത്താല് മേയ് 11ന് സ്രവ പരിശോധന നടത്തിയപ്പോള് കോവിഡ് 19 പോസിറ്റീവാണെന്ന് കണ്ടിരുന്നു.
രോഗം സ്ഥിരീകരിക്കപ്പെട്ടശേഷം റിയാദില് ചിലരൊക്കെ ഇദ്ദേഹത്തെ കണ്ടതായി പറയുന്നുണ്ടെങ്കിലും ഒരാഴ്ചയില് കൂടുതലായി ഇദ്ദേഹം വീട്ടുകാരുമായി ബന്ധപ്പെടുന്നില്ല. ഏതെങ്കിലും ആശുപത്രിയില് പരിചരണത്തിലാണെന്ന് സംശയമുണ്ടെങ്കിലും ആശുപത്രി ഏതാണെന്ന് കണ്ടെത്താന് കഴിഞ്ഞിട്ടില്ല. അല്ഈമാന് ആശുപത്രിയില്ന്ന് ഇമാം സഉൗദ് ബിന് അബ്ദുറഹ്മാന് ആശുപത്രിയിലേക്ക് മാറ്റിയിരിക്കാമെന്ന ആശുപത്രി ജീവനക്കാരിയുടെ ശബ്ദ സന്ദേശം സമൂഹ മാധ്യമങ്ങളില് പ്രചരിക്കുന്നുണ്ടെങ്കിലും സ്ഥിരീകരിക്കാന് കഴിഞ്ഞിട്ടില്ല.
റിയാദില് താജുദ്ദീന്റെ തൊട്ടടുത്തെ റൂമിലെ താമസക്കാരനും ബന്ധുവുമായ മൈനാഗപ്പള്ളി സ്വദേശി ഷെരിഫ് ഇബ്രാഹിം കോവിഡ് ബാധിച്ച് മേയ് എട്ടിന് മരിച്ചിരുന്നു. ഒരു മാസം ആശുപത്രിയിലെ തീവ്രപരിചരണ വിഭാഗത്തില് കഴിഞ്ഞശേഷമായിരുന്നു അന്ത്യം. അതോടനുബസിച്ച് റൂമിലുള്ളവര് ക്വാറന്റീനില് പോയി തിരിച്ചെത്തിയപ്പോള് താജുദ്ദീന് ഒരു ഹോട്ടലിലേക്ക് താമസം മാറ്റി. എന്നാല് അടുത്ത ദിവസം തന്നെ വസ്ത്രങ്ങള് ആ ഹോട്ടലില് ഉപേക്ഷിച്ച് അവിടെനിന്ന് പോയെന്നും പറഞ്ഞുകേള്ക്കുന്നു. അദ്ദേഹത്തെക്കുറിച്ച് എന്തെങ്കിലും വിവരം ലദ്യമായാല് 0530669529 (എം. സാലി) എന്ന നമ്പറില് ബന്ധപ്പെടണമെന്ന് അറിയിച്ചു.
