ഇടുക്കി ; ഇടുക്കിയിലെ അക്രമകാരിയായ അരിക്കൊമ്പനെ കൂട്ടിലാക്കാനുള്ള ദൗത്യം ഞായറാഴ്ചത്തേക്ക് മാറ്റി. കുങ്കിയാനകള് എത്താന് വൈകുന്നതും ഹയര് സെക്കന്ഡറി പരീക്ഷയും പരിഗണിച്ചാണ് തീരുമാനം. ദൗത്യസംഘത്തിലെ രണ്ടാമത്തെ കുങ്കിയാന, സൂര്യന് ചിന്നക്കനാലില് എത്തി. ജനങ്ങള്ക്ക് ബോധവത്കണം നല്കുന്നതിന്റെ ഭാഗമായി ചിന്നക്കനാല്ശാന്തന്പാറ പഞ്ചായത്തുകളില് സംയുക്ത യോഗം ചേര്ന്നു.
ഇന്ന് പുലര്ച്ച ആറരയോടെ സൂര്യനെന്ന കുങ്കിയാന ചിന്നക്കനാലില് എത്തി. രണ്ടുദിവസം മുന്നേ പുറപ്പെട്ട വിക്രത്തിനൊപ്പമാണ് സൂര്യനെയും തളച്ചിരിക്കുന്നത്. ഇനിയെത്താനുള്ളത് ദൗത്യസംഘത്തിലെ ശക്തന്മാരായ കുഞ്ചുവും, കോന്നി സുരേന്ദ്രനുമാണ്. പ്രത്യേകം പരിശീലനം ലഭിച്ച കുങ്കിയാനകളാണ് നാലും. അരിക്കൊമ്പനെ പൂട്ടാന് എല്ലാ ഒരുക്കങ്ങളും പൂര്ണ്ണമെന്ന് വനം മന്ത്രി എകെ ശശീന്ദ്രന് വ്യക്തമാക്കി. ശനിയാഴ്ചയോ ഞായറാഴ്ചയോ കൊമ്പനെ കൂട്ടിലാക്കാനാകുമെന്നാണ് പ്രതീക്ഷയെന്ന് മന്ത്രി പറഞ്ഞു.
മാര്ച്ച് 25ന് ഡോക്ടര് അരുണ് സക്കറിയയുടെ നേതൃത്വത്തില് 71 അംഗ ദൗത്യസംഘത്തെ 11 ടീമുകളാകും. അന്ന് തന്നെ കുങ്കി ആനകളെ ഉള്പ്പെടുത്തി മോക്ക് ഡ്രില് നടക്കും. മാര്ച്ച് 26ന് പുലര്ച്ചെ നാലുമണിക്ക് അരിക്കൊമ്പനെ കൂട്ടിലാക്കാനുള്ള ദൗത്യം തുടങ്ങും. നിലവില് പെരിയകനാല് ഭാഗത്തുള്ള അരിക്കൊമ്പനെ സിമന്റ് പാലം, 301 കോളനി എന്നീ ഭാഗത്തേക്ക് എത്തിച്ച് മയക്ക് വെടിവയ്ക്കാനാകുമെന്നാണ് വനംവകുപ്പിന്റെ കണക്കുകൂട്ടല്.
