പത്തനംതിട്ട : പെരിങ്ങര പഞ്ചായത്തിലെ മൂന്നു നവീകരണ പ്രവൃത്തികള്‍ക്ക് എംഎല്‍എ ഫണ്ടില്‍ നിന്നും 43.35 ലക്ഷം രൂപ അനുവദിച്ചതായി മാത്യു ടി തോമസ് എം എല്‍ എ അറിയിച്ചു.
പെരിങ്ങര പഞ്ചായത്തിലെ 14-ാം വാര്‍ഡിലെ ബ്രഹ്മികുളം-കുട്ടക്കാട് റോഡിന്റെ സംരക്ഷണ ഭിത്തി കെട്ടുന്നതിനായി 12.8 ലക്ഷം രൂപയാണ് അനുവദിച്ചിട്ടുള്ളത്. ഈ പ്രദേശത്തുള്ള പത്തോളം കുടുംബങ്ങള്‍ക്ക് ആറു മാസക്കാലം മാത്രമേ വഴി നടക്കുവാന്‍ സാധിക്കുകയുള്ളു. ബാക്കി സമയം ഈ റോഡ് വെള്ളത്തില്‍ മുങ്ങി കിടക്കുകയായിരിക്കും. റോഡ് സംരക്ഷണഭിത്തി കെട്ടി ഉയര്‍ത്തുന്നതോടെ ഇവരുടെ യാത്ര സുഗമമാകും.
25 ഓളം കുടുംബങ്ങള്‍ക്ക് പ്രയോജനപ്പെടുന്ന 14-ാം വാര്‍ഡിലെ ചിറയില്‍ കണ്ടത്തില്‍ പടി – പീടികച്ചിറ റോഡ് നിര്‍മ്മാണത്തിനായി 14.55 ലക്ഷം രൂപയാണ് അനുവദിച്ചിട്ടുള്ളത്. 11-ാം വാര്‍ഡിലെ വെള്ളക്കെട്ട് അനുഭവപ്പെടുന്ന മാടമ്പി പടി അമ്പലത്തറ റോഡ് ഉയര്‍ത്തി ഗതാഗത യോഗ്യമാക്കുന്നതിന് 16 ലക്ഷം രൂപയും അനുവദിച്ചിട്ടുണ്ട്. 35 ഓളം കുടുംബങ്ങള്‍ ഉപയോഗിക്കുന്ന വഴിയാണ് ഇത്. എല്‍എസ്ജിഡി എന്‍ജിനീയറിംഗ് വിഭാഗത്തിനാണ് ഇതിന്റെ നിര്‍മാണ ചുമതല.
